काठमाडौं । सरकारले ल्याएको सामाजिक सञ्जाल निर्देशिकाले सामाजिक सञ्जालमा विभिन्न किसिमका अनैतिक एवं गैरकानुनी गतिविधिमा रोक लगाएको छ । सामाजिक सञ्जालको प्रयोगलाई व्यवस्थित गर्नेसम्बन्धी निर्देशिका, २०८० ले अरूलाई होच्याउने नियतले कुनै सामग्री वा ट्रोल बनाउन रोक लगाएको छ ।

सोमबार सार्वजनिक निर्देशिकाले एनिमेसन वा मोन्टाज जस्ता प्रविधिमार्फत कुनै व्यक्तिको तस्बिर विकृत रुपले परिमार्जन गरी प्रकाशन वा प्रसारण गर्नमा रोक लगाएको छ ।

यस्तै, सार्वजनिक प्रकृतिका बाहेक निजी मामिलाका फोटो तथा भिडियो अनुमतिबिना खिचेर सम्पादन, प्रकाशन र प्रसारण गर्न पाइने छैन ।

निर्देशिकाअनुसार अश्लील शब्द, तस्बिर, अडियो, भिडियो एनिमेसनलाई प्रकाशन गर्न पाइने छैन । यस्ता सामग्रीको समर्थनमा कमेन्ट पनि गर्न पाइने छैन ।

यस्तै, बालवालिकालाई हानि पुन्याउने सामग्री तथा बाल यौन शोषण, यौन दुर्व्यवहार, देह व्यापारलगायत निषेध गरिएका क्रियाकलापलाई प्रोत्साहन गर्न पाइने छैन ।

सामाजिक सञ्जालमा मिथ्या सूचना, भ्रामक सूचना, दुष्प्रचार, सूचना तोडमरोड गरी प्रकाशन वा प्रसारण गर्न पाइने छैन ।

कसैलाई गाली गर्ने, हतोत्साहित बनाउने, धम्क्याउने वा हैरान पार्ने जस्ता साइबर बुलिङ मानिने कार्य गर्नमा समेत निर्देशिकाले रोक लगाएको छ ।

यस्तै, लागुऔषध, जुवा, आतङ्कवाद, आईडी तथा सूचना ह्याक गर्ने, फिसिङ, इम्पोटर, विभत्स तस्बिर, भिडियो पोस्ट वा सेयर गर्ने, कानुनले निषेध गरेका वस्तुको विज्ञापन जस्ता गतिविधिमा समेत निर्देशिकाले रोक लगाएको छ ।