काठमाडौं । आईसीसी एकदिवसीय विश्वकपको फाइनलमा भारतले अस्ट्रेलियाविरुद्ध ब्याटिङमा मध्यम सुरुआत गरेको छ ।

भारतको नरेन्द्र मोदी रंगशालामा जारी खेलमा टस हारेर ब्याटिङमा उत्रिएको घरेलु टिमले सुरुआती १० ओभरमा दुई विकेट गुमाएर ८१ रन बनाएको छ ।

भारतबाट हाल क्रिजमा रहेका विराट कोहलीले २३ र श्रेयस ऐयरले चार रन बनाएका छन् । त्यसअघि, भारतका ओपनरद्वय कप्तान रोहित शर्माले ४७ र शुभमन गिलले चार रन बनाएका थिए ।

अस्ट्रेलियाका ग्लेन म्याक्सवेल र मिचेल स्टार्कले समान एक विकेट लिए ।

दुवै टिम प्रतियोगिताको १३औँ संस्करणमा आफूलाई विजेता बनाउने लक्ष्यसहित मैदानमा उत्रिएका छन् । हालसम्म भारतले दुई र अस्ट्रेलियाले पाँचपटक विश्वकपको उपाधि जितेका छन् ।

विश्वकपको फाइनलमा स्थान बनाउने क्रममा भारतले न्युजिल्यान्डलाई ७० रनले र अस्ट्रेलियाले दक्षिण अफ्रिकालाई तीन विकेटले हराएको थियो ।

प्रतियोगितामा भारत एक मात्र अपराजित टिम हो । भारतले समूह चरणको खेलमा अस्ट्रेलियाविरुद्ध ६ विकेटको जित निकालेको थियो ।