काठमाडौं । आईसीसी एकदिवसीय विश्वकपको उपाधिका लागि आइतबार घरेलु टिम भारत र अस्ट्रेलिया भिड्दै छन् । 

यसअघि विश्वकप च्याम्पियन बनिसकेका दुवै टिम प्रतियोगिताको १३औँ संस्करणमा आफूलाई विजेता बनाउने लक्ष्यसहित मैदान उत्रिँदै छन् । हालसम्म भारतले दुई पटक र अस्ट्रेलियाले पाँच पटक विश्वकपको उपाधि जितेका छन् । 

अहमदाबादस्थित नरेन्द्र मोदी रंगशालामा हुने फाइनल खेल नेपाली समयानुसार दिउँसो २ः१५ बजेदेखि सुरु हुनेछ ।

विश्वकपको फाइनलमा स्थान बनाउने क्रममा भारतले न्युजिल्यान्डलाई ७० रनले र अस्ट्रेलियाले दक्षिण अफ्रिकालाई तीन विकेटले हराएको थियो । 

प्रतियोगितामा भारत एकमात्र अपराजित टिम हो । भारतले यसअघि समूह चरणको खेलमा अस्ट्रेलियाविरुद्ध ६ विकेटको जित निकालेको थियो । 

फाइनल पुगेका दुई टिमका समान दुई खेलाडीलाई समेट्दै बाह्रखरीले तयार पारेको प्रभाव पार्न सक्ने चार खेलाडी यस्ता छन् :

विराट कोहली (भारत) 
भारतीय शीर्ष क्रम ब्याटर विराट कोहली जारी विश्वकपमा सम्भवतः आफ्नो करियरकै उच्च लयमा छन् । भारतको सबै जितमा ‘म्याच विनिङ’ प्रदर्शन दिएका कोहलीले १० खेलमा ७११ रन बनाएका छन् । 

प्रतियोगिताको उच्च रन बनाउने खेलाडीको दौडमा पहिलो स्थानमा रहेका कोहलीले तीन शतक र पाँच अर्धशतक प्रहार गरेका छन् । फाइनलमा कोहलीको विकेटका लागि अस्ट्रेलियन कप्तान प्याट कुमिन्सको रणनीति महत्वपूर्ण हुनेछ ।

डेविड वार्नर (अस्ट्रेलिया) 
जारी विश्वकपमा अस्ट्रेलियाबाट सर्वाधिक रन बनाउने ब्याटर हुन् ओपनर डेविड वार्नर । अस्ट्रेलियाले फाइनलसम्मको यात्रा तय गर्दा वार्नरले १० खेलमा ५२८ रन बनाएका छन् । यसक्रममा उनले दुई शतक र दुई अर्धशतक बनाएका छन् । उनी प्रतियोगितामा सबैभन्दा धेरै रन बनाउने खेलाडीको सूचीको छैटौँ स्थानमा छन् । 

मोहम्मद शामी (भारत)
जारी विश्वकपमा भारतीय बलर शामी पनि आफ्नो करियरकै उच्च लयमा छन् । भारतले फाइनलमा स्थान बनाउँदा खेलेका १० खेलमध्ये ६ खेलमा मात्र मौका पाएका शामीले २३ विकेट लिएका छन् । सर्वाधिक विकेट लिने खेलाडीको शीर्ष स्थानमा रहेका शामीले जारी प्रतियोगितामा तीन पटक पाँच विकेट र एक पटक चार विकेट लिएका छन् ।

एडम जाम्पा (अस्ट्रेलिया) 
जारी प्रतियोगितामा अस्ट्रेलियाबाट सबैभन्दा धेरै विकेट लिने बलर हुन् एडम जाम्पा । सर्वाधिक विकेट लिने खेलाडीको सूचीमा दोस्रो स्थानमा रहेका जाम्पाले १० खेलमा २२ विकेट लिएका छन् । जारी प्रतियोगितामा जाम्पाले तीन पटक एकै खेलमा चार विकेट लिएका छन् । फाइलनमा जाम्पाको बलिङ अस्ट्रेलियाको उपाधि यात्रामा महत्वपूर्ण बन्ने निश्चित छ ।