काठमाडौं । पूर्व–पश्चिम राजमार्ग आसपासका अधिकांश स्थानका पेट्रोल पम्पमा ‘पेट्रोल छैन’ पर्चा टाँसिएको छ । तिहारको बिदाले गर्दा केही दिनसम्म बन्द रहेका पम्पहरूले पनि पेट्रोल नभएको सूचना टाँसेका छन् ।

यसरी पम्प्लेट राख्नेमा कैलाली, कंचनपुर, बर्दिया, बाँके र दाङ क्षेत्रमा पर्ने पूर्व–पश्चिम राजमार्ग आसपासका पेट्रोल पम्पहरू छन् । यी जिल्लामा पर्ने सडकखण्डका अधिकांश पेट्रोल पम्पमा नै यस्ता पर्चा टाँसिएको छ ।

लगातार बिदाले गर्दा केही डिपोमा यस्तो समस्या आएको हुन सक्ने सम्भावना भए पनि त्यसको बारेमा आफूले बुझ्ने नेपाल आयल निगमका प्रवक्ता मनोजकुमार ठाकुरले बताए ।

“निरन्तरको बिदाले गर्दा केही समस्या आएको होला । तर, पेट्रोल नै नभएको भन्ने चाहिँ हैन । समस्या नआओस् भनेर हामीले अम्लेखगंज डिपोलाई दैनिक खोल्न लगाएका छौँ,” उनले भने, “केही समस्या भएको भए हामी पनि अनुगमन गर्छौ ।”