काठमाडौं । नेपाल सुपर लिग (एनएसएल)को दोस्रो संस्करणका लागि ललितपुर सिटी एफसीले जर्सी सार्वजनिक गरेको छ । ललितपुरले बुधबार एक कार्यक्रममाझ प्रतियोगिताका लागि होम र अवे जर्सी सार्वजनिक गरेको हो ।

ललितपुर महानगरपालिकाकी उपमेयर मञ्जली शाक्य बज्राचार्यले जर्सी सार्वजनिक गरेकी हुन् ।

ललितपुरले होम जर्सीको रूपमा रातो र कालो रङको जर्सी सार्वजनिक गरेको छ । यस्तै, अवे जर्सी सेतो र रातो रङको छ । जर्सीको दायाँतर्फ क्लबको लोगो र बायाँतर्फ किट पार्टनर टी–१० स्पोर्ट्सको लोगो छ ।

एनएसएलको दोस्रो संस्करणमा ललितपुरलाई प्रभु बैंकले मुख्य प्रायोजक गरेको छ । क्लबले मुख्य प्रशिक्षकमा पियान एन्ड्रयु मिलान र सहायक प्रशिक्षकमा रविन्द्र सिलाकारलाई भित्र्याएको छ ।

कार्यक्रममा बोल्दै उपमेयर बज्राचार्यले क्लबले ललितपुरको सांस्कृतिक महत्त्वलाई पनि बोकेर हिँडेको बताइन् ।

"क्लबको नामले ललितपुरलाई बोकेको छ । सँगै क्लबले फुटबलबाट कल्चरलाई पनि जोड्न खोज्नुभएको छ । क्लबले ललितपुर सिटी, फुटबल र कल्चरलाई एकसाथ ल्याएको छ । क्लबले खेलको माध्यमबाट ललितपुर सिटीको कल्चरलाई युवा र अन्तर्राष्ट्रियस्तरमा पुर्‍याउने छ भन्ने आशा लिएको छु । क्लबलाई आगामी दिनमा पूर्ण सफलताको कामना गर्न चाहन्छु," उनले भनिन् ।

यस्तै, क्लबका प्रबन्ध निर्देशक आलोकजंग जोशीले जर्सीमा ललितपुरको संस्कृतिलाई जोड्न खोजिएको बताए ।

"हामीलाई साथ दिनुहुने सम्पूर्ण प्रायोजकहरूमा धन्यवाद । हामीले होम र अवे दुवै जर्सीमा ललितपुरको कल्चरलाई झल्काउने प्रयास गरेका छौँ । हामीलाई यहाँसम्म आउन सहयोग गर्नुहुने सम्पूर्णमा धन्यवाद व्यक्त गर्न चाहन्छु," निर्देशक जोशीले भने ।

एनएसएलको दोस्रो संस्करण मंसिर ९ गतेदेखि सुरु हुँदै छ । प्रतियोगिताको दोस्रो संस्करणमा कुल नौ टिमले प्रतिस्पर्धा गर्ने छन् । ललितपुरले मंसिर १० गते बुटवल लुम्बिनी एफसीविरुद्ध खेल्दै प्रतियोगिताको सुरुआत गर्ने छ ।