काठमाडौं । सप्तरीको खडक नगरपालिका–११, बनौलीबाट थ्रिनटथ्री राइफलको गोली पाँच राउन्ड र लागुऔषधसहित दुईजना पक्राउ परेका छन् । उनीहरूलाई मंगलबार बेलुकी प्रहरीले पक्राउ गरेको हो । 

पक्राउ पर्नेहरूमा सिरहाको लक्ष्मीपुर पतारी गाउँपालिका–२ बस्ने १९ वर्षीय धर्मजितकुमार यादव र सप्तरीको खडक नगरपालिका–११, बनौली बस्ने १८ वर्षीय किशोर रहेका छन् ।

उनीहरूको साथबाट अवैध लागुऔषध गाँजा करिब २० ग्राम र नियन्त्रित लागुऔषध नाइट्राभेट दुई ट्याब्लेट पनि बरामद गरिएको छ । 

इलाका प्रहरी कार्यालय कल्याणपुरबाट खटिएको प्रहरीले धर्मजितलाई गोली र किशोरलाई लागुऔषधसहित पक्राउ गरेको जनाइएको छ ।