काठमाडौं । वेस्ट इन्डिजका स्पिनर सुनिल नारिनले अन्तर्राष्ट्रिय क्रिकेटबाट सन्न्यासको घोषणा गरेका छन् । नारिनले वेस्ट इन्डिजबाट १०० भन्दा धेरै अन्तर्राष्ट्रिय खेल खेलेका छन् ।

सन् २०१२ मा श्रीलंकामा आयोजित ट्वान्टी–२० विश्वकपको उपाधि वेस्ट इन्डिजले जित्दा नारिन टिमका महत्त्वपूर्ण सदस्य थिए । उनले उक्त प्रतियोगितामा नौ विकेट लिएका थिए ।

नारिनले पछिल्लोपटक २०१९ मा वेस्ट इन्डिजमा अन्तर्राष्ट्रिय क्रिकेट खेलेका थिए । उनले सोमबार सामाजिक सञ्जालमार्फत सन्न्यासको घोषणा गरेका हुन् ।

“मैले वेस्ट इन्डिजबाट पछिल्लोपटक खेलेको चार वर्ष पुगिसकेको छ । तर, आज म अन्तर्राष्ट्रिय क्रिकेटबाट सन्न्यासको घोषणा गर्दै छु,” नारिनले सामाजिक सञ्जालमा लेखेका छन् ।

नारिनले वेस्ट इन्डिजबाट ६ टेस्टमा २१, ६५ एकदिवसीयमा ९२ र ५१ ट्वान्टी–२० अन्तर्राष्ट्रिय क्रिकेटमा ५२ विकेट लिएका छन् । उनले २०११ डिसेम्बर ५ मा भारतविरुद्धको खेलबाट अन्तर्राष्ट्रिय क्रिकेटमा ‘डेब्यु’ गरेका थिए ।