काठमाडौं । कीर्तिपुरस्थित त्रिवि क्रिकेट मैदानमा खचाखच दर्शकमाझ आइतबार आईसीसी ट्वान्टी–२० विश्वकप एसिया छनोटको उपाधि छिनोफानो भयो ।

घरेलु टिमले फाइनलसम्मको यात्रा तय गरेकाले उपाधि घरमै राखेको हेर्ने चाहनासहित मैदान पुगेका दर्शकलाई त्रिविको प्यारापिट शैलीको भिरालो जमिनले मुस्किलले धानिरहेको थियो । उपाधि भिडन्तमा थिए– नेपाल र ओमान ।

यी दुवै यस्ता टिम हुन्, जो एसोसिएट राष्ट्रमध्ये आफूलाई अब्बल सावित गर्न लागिरहेका छन् । 

यो खेलका लागि त्रिवि मैदानको कम्पाउडभित्र करिब १५ हजार दर्शक थिए । त्यतिकै संख्याका दर्शक टिकट नपाउँदा बाहिरै उभिएर हेरिरहेका थिए । रुखका हाँगा, मैदानबाहिर घरहरूको छतसमेत भरिभराउ थियो ।

तर, फाइनलमा घरेलु समर्थकको यो बेपरवाह मायालाई नेपाली टिमले न्याय गर्न सकेन । उपाधि भिडन्तमा नेपाल पाहुना टिमसँग सुपर ओभरमा ११ रनले पराजित भयो । टस जितेर ब्याटिङमा आएको नेपालले २० ओभरमा १८४ रन बनाएको थियो । १८५ रनको लक्ष्यसहित मैदान उत्रिएको ओमानले पनि २० ओभरमा नौ विकेट गुमाएर १८४ रनमात्र जोड्न सक्यो । त्यसपछि, खेलको निर्णयका लागि आवश्यक पर्‍यो, सुपर ओभरको ।

सुपर ओभरमा ओमानले पहिले ब्याटिङ गर्दै २१ रनको योगफल खडा गरेको थियो । ६ बलमा २२ रनको लक्ष्यसहित मैदान उत्रिएको नेपाली टिमले त्यसलाई भेटाउन सकेन । नेपालले १० रन जोड्दा दुई विकेट गुमाएपछि विजेताको टुंगो लाग्यो । ओमान च्याम्पियन बन्यो । तर, खेलको रोमाञ्चकता दर्शकका निम्ति ‘पैसा असुल’ रह्यो ।

त्यसो त यो हारबाट नेपाली टिम, मैदान पुगेका समर्थक र नेपाली क्रिकेट प्रेमी खासै निराश बनेनन् । किनकि फाइनलको दुई दिनअघिमात्र नेपालले १० वर्षपछि ट्वान्टी–२० विश्वकपमा स्थान बनाइसकेको थियो ।

नेपालमा आयोजित छनोटमा कुल आठ टिम सहभागी थिए । जसबाट फाइनल पुग्ने दुई टिम आगामी वर्षको ट्वान्टी–२० विश्वकपमा छनोट हुने प्रावधान थियो । जसमा नेपाल र ओमानले आगामी वर्ष उत्तर अमेरिकामा हुने विश्वकपमा स्थान निश्चित गरे ।

योसँगै विश्वकपको मञ्चमा एक दशकपछि नेपाली राष्ट्रिय गान गुन्जिने पक्का भएको छ । नेपालले पछिल्लोपटक सन् २०१४ मा भएको विश्वकप खेलेको थियो । जसलाई दक्षिण एसियाली छिमेकी बंगलादेशले आयोजना गरेको थियो ।

एक दशकको पर्खाइ

नेपालको विश्वकप यात्रा बुझ्न छनोटको फाइनलभन्दा दुई दिनअघि पुग्नुपर्छ । कात्तिक १७, शुक्रबार । मूलपानीस्थि माथिल्लो मूलपानी मैदानमा छनोटको एक सेमिफाइनल खेल थियो । जहाँ दुई अब्बल एसोसिएट राष्ट्र नेपाल र र मध्यपूर्वको अरबी मुलुक युनाइटेड अरब इमिरेट्स (यूएई) एकै लक्ष्यसहित मैदान उत्रिएका थिए ।

समूह ‘ए’ को उपविजेता नेपाल र ‘बी’ को विजेता यूएईबीचको यो खेल दुवै टिमलाई विश्व क्रिकेटमा परिचित गराउने एक अन्तिम लडाइँ थियो । पछिल्लो केही वर्षयता एसोसिएट क्रिकेटमा नेपाल र यूएईबीचको खेल ‘एल क्लासिको’ नै बनेको छ । टकराव, तनाव, अनिश्चितता र रोमाञ्च सबैको एकमुस्ट संग्रह नै बन्छ, यी दुईबीचको खेल ।

तर, शुक्रबार भने यो लडाइँमा घरेलु टिमले सहजै बाजी मार्‍यो । मुहम्मद वसिमको कप्तानीमा रहेको टिमले दिएको १३५ रनको लक्ष्य नेपालले १७.१ ओभरमा दुई विकेटको क्षतिमा भेटाउँदै विश्वकपमा स्थान निश्चित गर्‍यो ।

“एकदमै भाग्यमानी अनुभव भइरहेको छ । टिमका दुई जनाबाहेक सबै त्यही विश्वकप हेरेर हुर्किएको,” विश्वकपमा छनोट भइसकेपछि कप्तान रोहितकुमार पौडेलले भने, “सोम दाइ र विनोद दाइबाहेक सबैले त्यही विश्वकप हेरेर क्रिकेट खेल्न सुरु गरेका होलान् । २०१४ मा विश्वकप हेरेको, त्यसपछि क्रिकेट खेलेको, काठमाडौं आएको टिममा परेको । म एकदमै भाग्यमानी महसुस गरिरहेको छु ।”

२०१४ को विश्वकपपछि सोमपालमात्र यस्ता क्रिकेटर हुन्, जो एक दशकयता निरन्तर नेपाली टिममा छन् । सोमपाल नेपालले विश्वकप खेल्नेमात्र नभई जित्नेमा समेत विश्वस्त देखिए ।

“यो अनुभव शब्दमा बताउँनै सक्दिनँ । एकदमै खुसी लागिरहेको छ । विश्वकप नखेलेको पनि धेरै समय भइसक्यो । २०२३ ले धेरै चिजहरू दियो । एकदमै भाग्यमानी अनुभव भइरहेको छ,” सोमपालले भने, “हामी विश्वकप खेल्नमात्र हैन, जित्न पनि गइरहेको छौँ ।”

गत वर्षको हार र अहिलेको बदला 

नेपाल र यूएईले ट्वान्टी–२० अन्तर्राष्ट्रिय क्रिकेटमा एकै वर्ष प्रवेश गरेका हुन्, सन् २०१४ मा । दुवै टिमले बंगलादेशमा भएको ट्वान्टी–२० विश्वकपबाट क्रिकेटको यो सानो संरचनामा ‘डेब्यू’ गरेका थिए । 

त्यसपछि, यूएईले सन् २०२२ को ट्वान्टी–२० विश्वकप पनि खेल्यो । जतिबेला यूएईले विश्वकपका लागि निर्णायक खेलमा नेपाललाई नै हराएर दोस्रोपटक विश्वकप खेलेको थियो ।

सन् २०२२ को फेब्रुअरीमा ओमानमा भएको आईसीसी ट्वान्टी–२० विश्वकप क्वालिफायर ‘ए’ फाइनल पुग्ने दुई टिमले विश्वकप खेल्ने प्रावधान थियो । नेपाल समूह ‘बी’ को सबै खेल जित्दै विजेताको रूपमा सेमिफाइनल आएको थियो । यूएई भने समूह ‘ए’ को उपविजेता बन्दै अन्तिम चारमा आएको थियो । र, नेपाललाई ६८ रनले हराउँदै विश्वकपमा स्थान बनाएको थियो । त्यसबेला यूएईले दिएको १७६ रनको लक्ष्य पछ्याउने क्रममा नेपाल १८.४ ओभरमा १०७ रनमै अलआउट भएको थियो ।

एकपटक फेरि यही दुई टिम विश्वकप छनोटको निर्णायक खेलमा शुक्रबार भिडे । फाइनल पुग्ने दुई टिमले विश्वकप खेल्ने प्रावधान २०२२ को जस्तै थियो । तर, यसपटक समूह चरणको नतिजा भने फरक थियो । अहिले यूएई समूह ‘बी’को विजेता र नेपाल समूह ‘ए’को उपविजेताको रूपमा सेमिफाइनल आएका थिए । 

शुक्रबार मूलपानी क्रिकेट मैदानमा जित निकाल्दै नेपाल १० वर्षपछि विश्वकपको मञ्चमा उक्लियो, त्यो पनि गत वर्षको त्यो नमिठो हारको बदलासहित ।

रोहितले यूएईलाई हराउँदै विश्वकपमा छनोट भएको त्यो क्षणलाई सम्झिए, “भगवान्‌लाई धन्यवाद भनेँ । कसरी हुन्छ नेपालले यो विश्वकप खेल्न पाए हुन्थ्यो भन्ने कामना गरेको थिएँ । भएपछि भगवान्‌लाई धन्यवाद भनेँ ।”