काठमाडौं । गएराति जाजरकोट केन्द्रबिन्दु बनाएर गएको भूकम्पमा परेर अहिलेसम्म १३२ जनाको ज्यान गएको छ । जाजरकोटको रामीडाँडामा केन्द्रबिन्दु भएर गएको ६.४ म्याग्निच्युडको भूकम्पमा परेर जाजरकोट र पश्चिम रुकुममा बढी क्षति पुगेको छ ।

अहिले पनि ती क्षेत्रमा उद्धार कार्य जारी रहेको प्रहरीले जनाएको छ । नेपाल प्रहरीले दिएको जानकारीअनुसार जाजरकोटमा बिहान सवा ८ बजेसम्म ९५ जना र रुकुम पश्चिममा ३७ को मृत्यु भएको छ । 

समाचार तयार पार्दासम्म ती क्षेत्रमा जम्मा १४० बढी घाइते भएको प्रहरीले जनाएको छ । अहिले नेपाली सेना, नेपाल प्रहरी, सशस्त्र प्रहरी, स्थानीय, राजनीतिक दलका कार्यकर्तालगायत उद्धारमा खटिएका छन् ।

प्रहरीका अनुसार जाजरकोटमा ४५० जना प्रहरी र रुकुम पश्चिममा ३२० जना प्रहरी उद्धारमा खटिएका छन् । नेपाली सेनाले दिएको जानकारीअनुसार एम आई १७ हेलिकोप्टरबाट उद्धार भइरहेको छ ।

नेपाली सेनाले तीनजना डाक्टरसहित मेडिकल टिम सो क्षेत्रमा परिचालन गरेको जनसम्पर्क तथा सूचना निर्देशनालयले जनाएको छ । भूकम्पविदहरुका अनुसार बझाङ र बाजुरा केन्द्रबिन्दु बनाएर गएका यसअघिका भूकम्पको असर अहिले देखिँदा क्षति बढी भएको छ ।

“बझाङ र बाजुरामा पनि यसअघि यत्तिकै ठूला भूकम्प गएका थिए,” भूकम्पविद मुकुन्द भट्टराईले बाह्रखरीसँग कुरा गर्दै भने, “अरु भूकम्पले हल्लाएको घर अहिले भत्किए, राति मस्त निदाएको अवस्थामा मान्छेहरु बाहिर निस्कन पाएनन् । त्यसले धेरैजनाको ज्यान गएको हामीले अनुमान गरेका छौँ ।”

उनका अनुसार जाजरकोटमा गएको भूकम्पको गहिराई करिब १५ किमि रहेको छ । अहिले बिहानसम्म सो क्षेत्रमा १४३ वटा परकम्प गएका छन् । गएराति ११ बजेर ४७ मिनेट जाँदा पहिलोपल्ट भूकम्प गएको थियो । 

६.४ म्याग्निच्युडको भूकम्पले अहिलेसम्म जना बढीको ज्यान गइसकेको छ । पहिलो भूकम्प गएको करिब १५ मिनेटमै अर्को भूकम्पको झड्का महसुस भएको थियो । १२ बजेर २९ मिनेटमा ४.२ म्याग्निच्युड, त्यसको ६ मिनेटपछि फेरि ४.३ म्याग्निच्युडको भूकम्प गएको थियो ।

बिहान ४ बजेर १६ मिनेट जाँदा ४.६ म्याग्निच्युडको भूकम्प गएको थियो । राष्ट्रिय भूकम्प मापन केन्द्रका अनुसार असोज १६ गते बझाङ केन्द्रबिन्दु भएर ६.३ म्याग्निच्युडको भूकम्प गएको थियो । सोही दिनमा बझाङमा लगातार भूकम्प गएका थिए ।

२०८० कात्तिक ५ गते धादिङमा केन्द्रबिन्दु भएर ६.१ म्याग्निच्युडको भूकम्प गएको थियो । बाजुरामा भने २०७९ माघ १० गते केन्द्रबिन्दु बनाएर ५.९ म्याग्निच्युडको भूकम्प गएको थियो । बझाङ र बाजुरामा भूकम्प गएका बेला चर्किएका घरहरुमा अहिले बढी क्षति भएको केन्द्रको भनाई छ ।