काठमाडौं । राष्ट्रियसभा सदस्यहरूले राष्ट्रिय मर्यादासम्बन्धी अन्योल रहेका कुरालाई “राष्ट्रिय मर्यादासम्बन्धी विधेयक, २०७९” ले अन्त्य गर्ने बताएका छन् ।

मंगलबार 'राष्ट्रिय मर्यादासम्बन्धी विधेयक, २०७९' माथिको छलफलमा भाग लिँदै राष्ट्रियसभा सदस्य भैरवसुन्दर श्रेष्ठले विधेयकले विगतका अन्योलताहरूलाई चिर्ने प्रयास गरेको बताए । उनले २०७९ चैत्र ५ गते दर्ता भएकोमा आज विधेयकको रुपमा समितिको प्रतिवेदनसहित छलफलमा आउनु सकारात्मक भएको बताए ।

उनले भने, “राष्ट्रिय मर्यादासम्बन्धी विधेयक, २०७९ ले विगतका अन्योलताहरूलाई चिर्ने प्रयास गरेको छ । हामीले यी विषयहरूलाई कसरी सम्बोधन गर्ने भन्ने विषयमा अब स्पष्ट हुनेछ । सधैँ अब अन्योलतामा रहने छैनौँ । २०७९ चैत्र ५ गते दर्ता भएकोमा आज विधेयकको रूपमा समितिको प्रतिवेदनसहित छलफलमा उपस्थित भएका छौँ । एमालेको तर्फबाट पनि यो विधेयकप्रति पूर्ण समर्थन छ ।"

राष्ट्रियसभा सदस्य गोपीबहादुर सार्की अछामीले राष्ट्रियसभामा उत्पन्न भएको राष्ट्रिय महत्वका सबै क्षेत्र, राष्ट्रिय झण्डा र राष्ट्रिय गानसमेत सबैलाई व्यवस्थित गर्नको निम्ति बनाइएको बताए ।

उनले भने, "राष्ट्रियसभामा उत्पन्न भएको यो विधेयक राष्ट्रिय महत्वका सबै क्षेत्र र राष्ट्रिय झण्डा र राष्ट्रिय गानसमेत सबैलाई व्यवस्थित गर्नको निम्ति बनाइएको र भइसकेपछि अब नेपाल सरकारलाई पनि सहज हुने विश्वास छ ।"

छलफलमा भाग लिँदै राष्ट्रियसभा सदस्य राजेन्द्रलक्ष्मी गैरेले 'राष्ट्रिय मर्यादासम्बन्धी विधेयक, २०७९' ले राष्ट्रिय सभाको पनि गरिमा बोकेको बताए ।

राष्ट्रियसभा सदस्य तुलप्रसाद विश्वकर्माले विगतमा राष्ट्रिय मर्यादासम्बन्धी कुराहरू अन्योलमा रहेको र यो विधेयकबाट अन्योलताको अन्त्य हुने विश्वास व्यक्त गरे ।