काठमाडौं । बडादसैँ, तिहार, छठजस्ता पर्वका अवसरमा दलहरूले चियापान कार्यक्रम आयोजना गर्दै आएका छन् । विशेष गरी नेपाली कांग्रेस र नेकपा (एमाले)ले चियापानलाई निरन्तरता दिइरहेका छन् ।

कांग्रेसले कोजाग्रत पूर्णिमाका अवसरमा चियापान गर्दै आएको छ । तिथिमिति नतोकिए पनि केही वर्षयता एमालेले चियापान गर्दै आएको छ ।

यो वर्ष कांग्रेसले कात्तिक ११ गते चियापान कार्यक्रम आयोजना गरेको छ । सानेपास्थित पार्टी केन्द्रीय कार्यालयमै चियापन आयोजना गरिएको कांग्रेस प्रचार विभाग प्रमुख मीन विश्वकर्माले जानकारी दिए ।

राजनीतिक दलका नेता, सांसद, मन्त्री, संवैधानिक र सुरक्षा निकायका प्रमुख, कूटनीतिज्ञलगायत १० हजारजनालाई चियापनको निम्ता कार्ड पठाइएको उनले बताए ।

• कोजाग्रत पूर्णिमामा कांग्रेसको चियापान : १० हजारलाई निम्ता कार्ड

संसद्को दोस्रो ठूलो दल एमालेले कात्तिक १४ गते चियापन कार्यक्रम आयोजना गरेको छ । चियापान पार्टी केन्द्रीय कार्यालय च्यासलमै गरिनेछ ।

पार्टी कार्यालयका सचिव डा. भीष्म अधिकारीका अनुसार राजनीतिक दलका नेता, सांसद, मन्त्रीसहित कूटनीतिज्ञ, पार्टीका विभिन्न कमिटीका पदाधिकारीलगायत व्यक्तिलाई चियापानमा निम्तो दिइएको छ ।

किन गरिन्छ चियापान ? 
एकार्काप्रति कटाक्ष गरिरहने नेताहरू चियापान कार्यक्रममा एकै ठाउँमा देखिन्छन् । यस्ता कार्यक्रमले नेताहरूबीचको तिक्तता कम हुने उनीहरूको विश्वास छ ।

यस्ता कार्यक्रमले तिक्तता मेटाउन भूमिका खेल्ने कांग्रेसका प्रचार विभाग प्रमुख विश्वकर्मा बताउँछन् । “यस्ता कार्यक्रमले दलहरूबीचको तिक्तता हटाउन, भ्रातृत्व बढाउनका लागि मद्दत गर्छ,” उनी भन्छन् ।