काठमाडौं । दसैँको समयमा घर फर्कनेहरुबाट बढी भाडा असुल गरेपछि काठमाडौंको विभिन्न ठाउँबाट पाँचजना पक्राउ परेका छन् । जिल्ला प्रहरी परिसर कार्यलय काठमाडौंले बल्खु र कोटेश्वरबाट पाँचजना पक्राउ परेका जनाएको छ ।

प्रहरीले उनीहरुलाई सर्वसाधारणबाट बढी भाडा असुल गरेको, भिडभाडमा मानिसलाई अनावश्यक दुःख दिएको र नक्कलटी टिकट बनाएर ठगी गरेको पाइएपछि पक्राउ गरेको जानकारी दिएको छ ।

पक्राउ पर्नेमा बढी भाडा असुल गर्ने मकवानपुरको हेटौँडा स्थायी घर भएका सन्देश श्रेष्ठ, काठमाडौंका रोहित लामा रहेका छन् । यस्तै, नक्कली टिकट बनाएर यात्रुलाई ठगेपछि महोत्तरी बर्दिबासका अनिल बुढाथोकी, काठमाडौंका राजकुमार डंगोल र कोटेश्वरका कमल सार्कीलाई पनि प्रहरीले पक्राउ गरेको छ ।

प्रहरीले बढी भाडा असुल गर्ने, नक्कली टिकट बेच्ने, यात्रुलाई दुःख दिने र ठगी नियन्त्रण गर्न काठमाडौंमा टोली परिचालन गरेको छ । उक्त टोलीले आज पाँचजनालाई पक्राउ गरेको हो ।