काठमाडौं । फिफा विश्वकप–२०२६ दक्षिण अमेरिकी छनोटमा कप्तान लियोनल मेसीप्रेरित अर्जेन्टिनाले पेरुविरुद्ध २–० को जित निकालेको छ ।

बुधबार स्टाडियो नासिओनेल डे लिमामा सम्पन्न खेलमा घरेलु टिमविरुद्ध अर्जेन्टिनालाई जित दिलाउन दुवै गोल मेसीले गरे । अर्जेन्टिनाले दुवै गोल पहिलो हाफमा गरेको थियो ।

खेलको ३२औँ मिनेटमा मेसीले अर्जेन्टिनालाई १–० को अग्रतामा राखेका थिए । त्यसको १० मिनेटपछि मेसीले नै अर्जेन्टिनाको अग्रतालाई दोब्बर बनाए । यसपछि थप गोल हुन नसक्दा अर्जेन्टिनाले छनोटमा तीन अंक सुरक्षित ग¥यो । 

जितसँगै चार खेलबाट १२ अंक जोडेको अर्जेन्टिना तालिकाको शीर्ष स्थानमा छ । दक्षिण अमेरिकी छनोटमा अर्जेन्टिना अपराजित छ । सन् २०२२ को विश्वकपमा साउदी अरेबियासँग पराजित भएयता अर्जेन्टिनाले पछिल्ला १४ खेलमा शतप्रतिशत नतिजा निकालेको छ । 

समान खेलबाट एक अंक जोडेको पेरु तालिकाको नवौँ स्थानमा छ । 

बुधबार नै भएको अर्को खेलमा ब्राजिलले उरुग्वेविरुद्ध २–० हार बेहोरेको छ । उरुग्वेको राजधानी मन्टेभिडियोस्थित सेन्टानारियोना भएको खेलमा घरेलु टिमलाई जित दिलाउन डार्विन नुनेज र एन डे ला क्रुजले गोल गरे ।

जितसँगै चार खेलबाट सात अंक जोडेको उरुग्वे तालिकाको दोस्रो स्थानमा उक्लिएको छ । समान अंक भए पनि ब्राजिल तेस्रो स्थानमा छ । दक्षिण अमेरिकी छनोटमा ब्राजिलको यो पहिलो हार हो ।