काठमाडौं । नेकपा एमालेका अध्यक्ष तथा पूर्वप्रधानमन्त्री केपी शर्मा ओलीले आफूलाई हास्य कलाकार दीपकराज गिरी मन पर्ने गरेको बताएका छन् । कलासँगै समाजका विभिन्न विषयमा जानकारी र चासो राख्ने गरेकै कारण दीपक आफूलाई मन पर्ने गरेको उनको भनाइ छ । 

“जिन्दगीको एउटै मात्रै आयाम हुँदैन । जिन्दगीको एउटै मात्रै रङ हुँदैन । यसका अनेक रङ हुन्छन् । यो बुझ्ने मान्छे मलाई मन पर्छ,” ओटीटी प्लेटफर्म कान्तिपुर सिनेमाजको घोषणा समारोहमा सोमबार उनी भन्छन्, “म पनि राजनीतिबाहेक अरु कुराहरू पनि बुझ्ने प्रयास गर्छु । राजनीति गर्नु भनेको धुम्म परेर बस्नु होइन । समाजयका अन्य पक्ष पनि हेर्नुपर्छ ।”

उनले आफूलाई मदनकृष्ण श्रेष्ठ र हरिवंश आचार्य पनि मन पर्ने गरेको बताए । कारण उनीहरूले जीवनका अनेक रङसँग साक्षात्कार गरेको केपी बताउँछन् । महजोडीको प्रहसन  हास्य मात्रै नहुने भन्दै त्यसभित्र सन्देश पनि हुने गरेको उनको भनाइ छ । 

“उनीहरूको प्रहसनमा तीतो औषधिलाई सुगर प्रोटेट गरेर पठाइदिएको हुन्छ । समाजका कतिपय तीता पक्ष हुन्छन्, कतिपय अफ्ठ्यारा पक्षहरू हुन्छन् । त्यसमा असहमति जनाउनु पर्ने हुनसक्छ,” केपी भन्छन्, “उनीहरूले विभिन्न कालखण्डमा सेन्सरको समस्या उनीहरूले भोग्नु परेको थियो । एकपटक उहाँहरूको प्रहसन थियो । त्यसमा ०१७ साल भन्नु पर्नेथियो । तर सेन्सरले त्यो भन्न नदिएपछि उहाँहरूले ०१७ नभनेर ०१६ र ०१८ सालको बीचको वर्ष भनेछन् । यो झन कलात्मक सुनियो । सिधै ०१७ भन्दा कलात्मक हुँदैन थियो । यसरीभन्दा झन धेरै कलात्मक भयो ।”