काठमाडौं । स्पेन र स्कटल्यान्ड सन् २०२४ मा हुने युरोपियन च्याम्पियनसिपमा छनोट भएका छन् ।

आइतबार राति भएको खेलमा नर्वेलाई १–० ले पराजित गर्दै स्पेनले युरो–२०२४ मा स्थान पक्का गर्‍यो । स्पेनको यही जितका कारण स्कटल्यान्ड पनि आउँदो वर्ष हुने महादेशीय च्याम्पियनसिपमा छनोट भयो ।

नर्वेस्थित उलेभाल स्टाडियोनमा पाहुना टिमलाई जित दिलाउन स्पेनका गाभीले गरेको गोल निर्णायक बन्यो । गाभीले खेलको ४९औँ मिनेटमा गोल गरेका थिए ।

समूह ‘ए’मा ६ खेलबाट समान १५ अंक जोड्दै स्पेन र स्कटल्यान्ड युरोपियन च्याम्पियनसिपमा छनोट भएका हुन् । समान अंक रहे पनि स्पेन शीर्ष र स्कटल्यान्ड दोस्रो स्थानमा रहँदै छनोट भए ।

सात खेलबाट १० अंकको नर्वे तेस्रो स्थानमा छ । सात अंककै जर्जिया चौथो र अंकविहीन साइप्रस पुछारमा छ । समूहमा स्पेन, स्कटल्यान्ड र जर्जियाले समान दुई खेल खेल्न बाँकी छ ।

आइतबारै राति भएका अन्य खेलमा वेल्सले क्रोएसियालाई हरायो । टर्कीले लात्भियालाई र रोमानियाले एन्डोरालाई समान ४–० पराजित गरे ।