काठमाडौं । युरो च्याम्पियनसिप २०२४ छनोटमा इटालीले माल्टाविरुद्ध ४–० को सहज जित निकालेको छ ।

घरेलु मैदान स्टाडियो सान निकोलामा सम्पन्न खेलमा इटालीको जितमा डोमेन्को बेरार्डीले दुई गोल गरे । यस्तै, जियाकोमो बोनाभेन्चुरा, डेभिड फ्रटेसीले गोल गरे ।

खेलको २३औँ मिनेटमा बोनाभेन्चुराले गोल गर्दै घरेलु टिमलाई अग्रता दिलाएका थिए । पहिलो हाफको इन्जुरी समयमा बेरार्डीले गोल गरेपछि इटालीले अग्रतालाई दोब्बर बनाएको थियो ।

६३औँ मिनेटमा बेरार्डीले नै गरेको गोलबाट इटालीले अग्रतालाई ३–० मा पुर्‍यायो । यस्तै, इन्जुरी टाइममा फ्रटेसीले गोल गरेपछि इटालीले ४–० को सहज जित निश्चित गर्‍यो ।

जितसँगै समूह 'सी' मा पाँच खेलबाट १० अंक जोडेको इटाली दोस्रो स्थानमा उक्लिएको छ । यो समूहमा १३ अंकसहित इङ्ल्यान्ड तालिकाको शीर्ष स्थानम छ । ६ खेल खेल्दा पनि अंकविहीन माल्टा समूहको पुछारमा छ ।