काठमाडौं । राष्ट्रिय प्रजातन्त्र पार्टी (राप्रपा) नेपालका अध्यक्ष कमल थापाले प्रदेश संरचना खारेज गर्नुपर्ने बताएका छन् । संघीयताअन्तर्गत प्रदेश संरचना मुलुकका निम्ति घाँडो भएको उनको तर्क छ ।

शनिबार ललितपुरमा आयोजित एक कार्यक्रममा उनले वैदेशिक ऋणको भरमा कहिलेसम्म प्रदेश संरचनालाई कायम राख्ने ? भन्दै प्रश्न गरे । नेपालजस्तो सानो देशका निम्ति १०० भन्दा बढी मन्त्री र पाँच÷सात सयको संख्यामा सांसद आवश्यक नभएकाले कटौती गर्नुपर्नेमा उनले जोड दिए ।

वर्तमान व्यवस्था भ्रष्ट भएको भन्दै अध्यक्ष थापाले सुधारका निम्ति तयार हुन प्रमुख राजनीतिक दलहरूलाई आग्रह समेत गरे ।

सनातन धर्मको संरक्षण र भ्रष्ट व्यवस्था सुधारका निम्ति आफ्नो पार्टीले आन्दोलनको घोषणा गरेको उनको भनाइ छ ।