काठमाडौं । काठमाडौं उपत्यकाका केही ठाउँमा नेपाल टेलिकमको नेटवर्कमा समस्या आएको छ । नेपाल विद्युत् प्राधिकरणले तार जमिनमुनी हाल्ने क्रममा टेलिकमको फाइबर लाइन काटिएपछि सेवामा समस्या आएको हो । 

काठमाडौं र भक्तपुर जोड्ने मनोहरापुल क्षेत्रमा विद्युत् प्राधिकरणले ‘अन्डरग्राउन्ड’ गर्न खन्ने क्रममा फाइबर लाइन काटिएपछि कागेश्वरी मनोहरा नगरपालिकाका केही र उक्त फाइबरको नेटवर्कमा रहेका ठाउँमा समस्या आएको हो । 

नेपाल टेलिकमका प्रवक्ता शोभन अधिकारीले फाइबर लाइन काटिँदा फाइबर टू दी होम (एफटीटीएच) र डाटा सेवामा समस्या आएको बताएका छन् । 

“फोन लाग्ने सेवामा खासै समस्या नआएको हुनसक्छ, एफटीटीएच र डाटा सेवामा समस्या भएको छ,” अहिले समाधानका लागि काम भइरहेको र रातिको समयमा फाइबर जोड्न सहज नहुने भएकाले भोलि समस्या समाधान हुने उनले बताए । 

“मुख्य हाइवेकै फाइबर लाइन काटिएको रहेछ । समाधानका लागि काम भइरहेको छ तर, रात परिसकेकाले आजै सकिन्छ या सकिन्न भन्न नसकिने अवस्था छ । भोलि समाधान भइसक्छ,” टेलिकमका प्रवक्ता अधिकारीले भने । 

विद्युत् प्राधिकरणले त्यहाँ खन्ने क्रममा टेलिकमलाई जानकारी नगराउँदा फाइबर लाइन काटिएको टेलिकममले जनाएको छ । प्राधिकरणले समन्वय गरेको भए वा जानकारी गराएको भए त्यो बचाउन सकिने टेलिकमको भनाइ छ । पटक–पटक यस्तो समस्या हुने गरेकोमा प्राधिकरणसँग टेलिकमले असन्तुष्टिसमेत जनाएको छ ।