काठमाडौं । नेकपा (एमाले)का अध्यक्ष केपी शर्मा ओलीले पार्टीमा अनुशासनहीनता बढेको भन्दै आक्रोश पोखेका छन् । पार्टीको स्कुल विभागले पार्टी कार्यालयमा आज आयोजना गरेको कार्यक्रममा उनले पार्टी संगठनलाई नमानेको बताए ।
उनले 'पार्टीका महासचिव, उपमहासचिवलाई मान्दैन भने कसलाई मान्छ ?' भन्दै प्रश्न पनि गरे ।
“अहिले सजिलो भएको छ । म महासचिव मान्दिनँ, के भन्या त्यो ? म उपमहासपचिव मान्दिनँ । म फलानोलाई मान्दिनँ । के भनेको त्यो ? त्यो मान्दिनँ भन्ने साथी पार्टीमा छ कि छैन भनेर बुझ्ने ?,” ओलीले भने, “कसलाई मान्छ त ? घरमा गएर बालाई मान्छ ? आमालाई मान्छ ? मान्नैपर्छ । पार्टीमा संगठन छ । संगठन मान्ने कुरा हो ।”
उनले पार्टीमा अनुशासन आवश्यकता हुने बताए ।
“यो मान्दिनँ । ऊ मान्दिनँ भन्ने अनुशासनहीन अराजक कुरा हुन् । जसले पार्टी, पार्टी रहँदैन । पार्टीको ढंगले हिँड्दैन,” ओलीले भने, “पार्टीलाई पार्टीको ढंगले चलाउन अनुशासन चाहिन्छ । जनवादी केन्द्रीयता चाहिन्छ ।”
उनले पार्टी स्कुल विभागबाट प्रशिक्षण पाएकाहरूलाई अराजकता स्वीकार नगर्न आग्रह गरे ।
“अराजकतालाई एक इन्च पनि स्वीकार नगर्नुस् । जनवाद नबुझ्नेले पार्टी बुझेन, अराजकता बुझ्यो,” उनले भने ।
