site stats
बाह्रखरी :: Baahrakhari
विदेश
Global Ime bankGlobal Ime bank
इजरायलले १५० बन्धकलाई हमासको नियन्त्रणबाट कसरी छुटाउला, कस्तो छ तयारी ?

काठमाडौं । प्यालेस्टिन चरमपन्थी समूह हमासले गएको शनिबार (असोज २० गते) अचानक इजरायलमाथि आक्रमण गरेपछि हमास र इजरायलबीच युद्ध चर्किएको छ । हमास रहेको गाजाको सिमानामा इजरायलले ठूलो संख्यामा सैनिक तैनाथ गरेको छ । इजरायलले पनि अप्रत्याशित अवस्थामा सामना गरिरहेको छ ।

बितेको ६ दिन इजरायलले गाजामा (हमासमाथि) हवाई आक्रमण मात्र गरेको थियो । अब गाजामा स्थल आक्रमण गर्ने इजरायलको तयारी छ । यसैकारण तीन लाखभन्दा बढी आफ्ना सेना गाजाको सिमानामा लगेर राखेको छ ।

गाजामाथि इजरयालको स्थल आक्रमण जुनसुकै बेला हुन सक्छ । यसैकारण इजरायली सेनाले उत्तरी गाजामा रहको प्यालेस्टिनलाई २० घण्टाभित्र दक्षिण गाजामा जान उर्दी जारी गरेको छ । उत्तरी गाजामा ११ लाख प्यालेस्टिन बस्छन् ।

Israel-Hamas-1696900702.jpg

इजरायली सेनालाई उर्दी फिर्ता लिन संयुक्त राष्ट्रसंघले अपिल गरेको छ । तर, इजरायल मानिरहेको छैन । हमासले पनि उत्तरी गाजामा रहेका प्यालेस्टिनलाई आफ्नो घर नछोड्न भनेको छ । इजरायलले उत्तरी गाजा छोड्न उर्दी जारी गरेर मनोवैज्ञानिक युद्ध गरिरहेको बुझाइ हमासको छ ।

पछिल्ला आक्रामक गतिविधि हेर्दा इजरायल यसै रोकिने देखिँदैन । किनकि इजरायललाई हमासले बन्धक बनाएका आफ्ना १५० जना नागरिकलाई छुटाएर ल्याउनुपर्ने छ ।

बन्धक बनाइएकाहरू इजरायली मात्र छैनन् । त्यहाँ नेपाली, अमेरिकी, थाईलगायतका विदेश नागरिक पनि छन् । बन्धकहरूलाई गाजाको गोप्य स्थानमा राखिएको अनुमान गरिएको छ । बन्धकमा महिला, बालबालिका र वृद्ध पनि छन् । 

धेरैले अनुमान गरेका छन्– यदि इजरायलले गाजामा स्थल आक्रमण सुरु गर्‍यो भने के होला ? के बन्धक जीवित रहलान् ?

सम्झौताको सम्भावना कति छ ?

इजरायल र हमासबीच युद्ध चर्किए पनि केही देश भित्रभित्रै बन्धक छुटाउने प्रयासमा छन् । कतार, इजिप्टलगायतका देश यो सूचिमा पर्छन् ।

हमास र इजरायलबीच सम्झौता हुन सक्ने एउटा सम्भावना छ । इजरायलको जेलमा ३६ जना प्यालेस्टिन महिला तथा किशोरी छन् । यदि इजरायलले ती महिला तथा किशोरीलाई छोडे हमासले पनि आफूले बन्धक बनाएका महिला तथा बालबालिकालाई छोड्न सक्छ ।

माइकल मिल्स्टिन इजरायलको रिचमन विश्वविद्यालयको इन्स्टिच्युट फर पोलिसी एन्ड स्ट्राटिजीमा वरिष्ठ विश्लेषक हुन् । मिल्स्टिनका अनुसार अन्य बेला भएको भए इजरायलको प्राथमिकतामा बन्धक हुन्थे र। तर, आज इजरायलको प्राथमिकता हमासको सफाया रहेको छ ।

Israe-hamas-1-1696913870.jpg

अहिले दुवैतर्फ आक्रोश र तनाव उच्च विन्दुमा छ । सम्झौता गर्ने मुडमा न इजरायल छ न हमास । इजरायल यसपटक बढी नै रिसाएको छ । यति सजिलै हमासले आफ्नो देशमा छिरेर आफ्ना नागरिकलाई बन्धक बनाएर लैजाला भन्ने इजरायलले सोचेकै थिएन । अझ एक हजार ३ सयभन्दा बढी इजरायलीको हत्या गर्लान् भन्ने त कल्पना बाहिरको कुरा थियो ।

शनिबारयता इजरायलले गाजाका तीनहजार ६०० भन्दा बढी स्थानमा ६ हजारभन्दा बढी बम खसालेको छ । पछिल्लो ६ दिनको युद्धमा एक हजार ३०० भन्दा बढी इजरायली र १ हजार ५ सयभन्दा बढी प्यालेस्टिन मारिएका छन् । गाजामा इन्धन, पानी, बिजुली र औषधिको आपूर्ति इजरायललो रोकिदिएको छ ।

 हमासको चेतावनी

हमासले बिना कुनै चेतावनी इजारायलले गर्ने हवाई आक्रमणमा प्यालेस्टिनको मृत्यु भए बदलामा एकजना इजरायली बन्धकलाई फाँसी दिने धम्की दिएको छ । हमासले यस्तो गरेको अहिलेसम्म प्रमाण भने भेटिएको छैन । 

यता इजरायलले पनि संयमता अपनाउने संकेत देखाएको छैन । हरेक दिन गाजामाथि हवाई आक्रमण गरेको छ । गाजाको ठूलो भाग भग्नावशेषमा परिणत भएको छ ।

मिल्सटिनको बुझाइमा हमासले महिला, बालबालिका र वृद्धलाई लामो समय बन्धक बनाएर राख्ने छैन । अन्तर्राष्ट्रियस्तरमा यो उसका लागि खराब विकल्प हो । 

बन्धकमध्ये केहीलाई अत्यधिक हेरचाहको आवश्यकता हुन सक्छ । अर्को पक्ष इजरायलले गरिरहेको लगातारको हवाई आक्रमणबाट उनीहरूलाई जोगाउन पनि त्यति सहज छैन । यदि बन्धकमा कुनै सैनिक पनि छन् भने हमासले त्यसको धेरैभन्दा धेरै फाइदा उठाउन खोज्ने छ । यदि वार्ता वा सम्झौता भए सैनिकको रिहाइलाई लिएर हमासले अधिकतम फाइदा लिने छ । 

इजरायल सरकारको द्विविधा

जब बन्धकको कुरा आउँछ इजरायल सरकार द्विविधामा पर्छ । 

के इजरायलले बन्धकलाई बचाउन ठूलो जोखिम मोलेर सशस्त्र आक्रमण गर्ला ? के इजरायल लामो समयसम्म प्रतिक्षा गर्ला ? त्यतिन्जेसम्म हवाई आक्रमणबाट कमजोर बनेको हमास आफैँ वार्ता र सम्झौताको लागि अघि सर्ला ?  

दुवै विकल्पमा खतरा उति नै छ । अहिले बन्धकहरूलाई जमिनमुनि सुरुङमा राखिएको अनुमान गरिएको छ, जुन नहुन पनि सक्छ । सुरुङ पनि हवाई आक्रमणबाट सुरक्षित नहुन सक्छन् ।

यसमा अर्को जोखिम पनि छ । कुनैबेला रिसको झोकमा हमासले बन्धकहरूलाई मारिदिन सक्छ । अथवा इजरायलले आफ्ना नागरिकलाई बचाएर लैजाने हमासलाई लागेमा त्यतिबेला उसले मार्न पनि सक्छ ।

यस्तो सन् २०१२ मा नाइजेरियामा भएको थियो । चरमपन्थीहरूले बन्धक बनाएका दुइजनालाई छुटाउन बेलायत र नाइजेरियाको विशेष सैनिक बलले प्रयास गरेका थिए । तर, असफल भए ।

इजरायलले बन्धकका विषयमा जानकारी लिन एउटा कक्ष बनाएको छ । यहाँ गाजा लगिएका बन्धकको पहिचान हुने सबै जानकारी राखिएको छ ।  

hamas-(2)-1696956247.jpg

इजरायलको क्षमता 

माइकल मिल्स्टिनले इजरायली सेनाको गुप्तचर सेवामा २० वर्ष काम गरेका थिए । उनका अनुसार इजरायली सेनासँग गाजाको हरेक सडक र घरको आँकडा छैन । गाजा हमासको क्षेत्र हो, जहाँ हमास बन्धकलाई लुकाउन सक्षम छ । उसलाई सुरुङको हरेक नेटवर्क थाहा छ ।

बन्धकलाई छुटाउने विषयमा इजरायल कमजोर छैन । बन्धक छुटाएको धेरै अनुभव इजरायली सेनासँग छ । यो इजरायली सेनाको विशेष क्षमता पनि हो ।

इजरायलको सन् १९५७ मा स्थापना गरिएको सायरेट मटकल युनिट बेलायतको एसएएस र अमेरिकाको डेल्टा फोर्स जत्तिकै सक्षम छ । यो सन् १९७६ मा युगान्डाको एन्टेबेमा गरेको कारबाहीबाट चर्चामा आएको थियो । एन्टेबेस्थित हवाई अड्डामा अपहरण गरिएको विमानबाट सायरेट मटकल युनिटले बन्धकलाई छुटाएर ल्याएको थियो ।

उक्त युनिटको कमान्डर योनातन नेतन्याहू थिए । एन्टेबेमा गरिएको कारबाहीमा मारिने उनी एक मात्र इजरायली कमान्डो थिए । उनको भाइ बेन्यामिन नेतन्याहू अहिले इजरायलमा प्रधानमन्त्री छन् ।

गाजामा रहेका बन्धकलाई संवादमार्फत छुटाउने कि बलपूर्वक छुटाउने यो इजरायलको निर्णयमा भर पर्ने छ । 

सबैभन्दा कठिन बन्धक संकट

हमासले शनिबार १५० जना इजरायलीलाई बन्धक बनाएपछि यसलाई अहिलेसम्मकै सबैभन्दा कठिन बन्धक संकटको रूपमा चित्रण गरिएको छ ।

अमेरिकाले बन्धक छुटाउन गुप्तचर सूचना तथा विशेष बलको रूपमा इजरायललाई सघाइरहेको छ । अमेरिकाले भूमध्यसागरमा आफ्नो जलसेनाको ठूलो जहाज तैनाथ गरिसकेको छ ।

तर, यथार्थ के पनि हो भने हमासले आफूलाई युद्धमा सक्षम प्रमाणित गरिसकेको छ । प्रविधि र आक्रमण गर्ने क्षमताका दृष्टिले हमास इजरायलसँग लड्न सक्षम छ । हमासले आफ्नो कुराकानीको कुनै ‘डिजिटल सिग्नल’ छोडेको छैन ।

आफ्ना कुराकानी र योजनालाई लुकाएर हमासले गत शनिबार इजरायललाई आश्चर्यमा पार्न सफल भयो । जहाँसम्म हमासका बन्दुकधारीले अहिले १५० जनालाई बन्धक बनाइरहेका छन्, उनीहरू सम्भव भएसम्म अफलाइन हुने छन् । उनीहरू एयरवेबभन्दा टाढै रहने छन् ।

हमासले अवश्य पनि बन्धकसँग रहेका डिजिटल उपकरण हटाइसकेको छ । माइकल मिल्स्टिन भन्छन्, “यो इजरायलको इतिहासमा सबैभन्दा कठिन बन्धक समस्या हो, जसको इजरायलले अहिलेसम्म सामना गरेको छैन ।”

(बीबीसीबाट भावनुवाद ।) 

प्रकाशित मिति: शुक्रबार, असोज २६, २०८०  १६:०३
worldlinkworldlink
प्रतिक्रिया दिनुहोस्
MPG Admark South Asian UniversityMPG Admark South Asian University
Nepal Life Insurance banner adNepal Life Insurance banner ad
Ncell Side Bar LatestNcell Side Bar Latest
Bhatbhateni IslandBhatbhateni Island
सम्पादकीय
Hamro patroHamro patro