काठमाडौं । कोसी प्रदेशमा मुख्यमन्त्रीको दाबी प्रस्तुत गरेका केदार कार्कीसहितको हस्ताक्षर प्रयोग गरेर माओवादी संसदीय दलका नेता इन्द्र आङ्बोको दाबी प्रस्तुत गरेका छन् । तर, नेपाली कांग्रेसका आठ सांसदले भने प्रदेश प्रमुखकोमा आफैँ उपस्थित भएर आङ्बोलाई समर्थन नरहेको भन्दै केदार कार्कीका पक्षमा हस्ताक्षर गरेका छन् । 

कांग्रेसका आठ सांसद आफ्नै नेतृत्वको सरकार गठनको पक्षमा रहेको र बहुमत समेत पुर्‍याएको भन्दै आङ्बोको समर्थनमा भएको हस्ताक्षर झुठो भएको उनीहरूको दाबी छ ।

केदार कार्कीको समर्थनमा देउवा समूहमा रहेका हिमाल कार्कीले पनि हस्ताक्षर गरेका छन् । उनले बिहीबार नै संसदीय दलको उपनेताबाट राजीनामा दिएका थिए ।  यसँगै कार्कीको पक्षमा समर्थन दिने सांसदको संख्या ४८ पुगेको छ । 

९३ सदस्य रहेको कोसी प्रदेशमा ४७ मत ल्याउनेको बुहमत पुग्छ । कार्कीलाई नेकपा (एमाले)का ४९ र कांग्रेसका नौ सांसदले समर्थनमा हस्ताक्षर गरेका छन् । 

“हामीले ३९ सांसदको हस्ताक्षरसहित केदार कार्कीलाई समर्थन दिएका छौँ,” एमालेका नेता तथा प्रदेश सांसद रेवतीरमण भण्डारीले बाह्रखरीसँग भने, “उहाँले कांग्रेसबाट आठ सांसदको समर्थन लिनुभएको छ । अब उहाँको पक्षमा स्पष्ट बहुमत पुगेको छ ।” 

उनले माअ‍ोवादी केन्द्र संसदीय दलका नेता इन्द्र आङ्बोले अर्कै प्रयोजनका लागि भएको सांसदहरूको हस्ताक्षर बुझाएको भन्दै त्यसले वैधानिकतामा प्रश्न उठाएको बताए । 

नेपाली कांग्रेसका प्रदेशसभा सदस्य शमशेर राईले भने मुख्यमन्त्रीमा माओवादी केन्द्रलाई समर्थन गर्नेगरी संसदीय दलमा छलफलसमेत नभएको बताए । उनले संसदीय दलमा छलफलसमेत नभएको विषयमा समर्थन दिनेगरी हस्ताक्षर सम्भव नभएको भन्दै आफूसहितको हस्ताक्षर दुरुपयोग गरिएको बताए । 

“माओवादी केन्द्रलाई समर्थन दिने विषयमा हाम्रो संसदीय दलमा छलफलसमेत भएकोृ छैन । संसदीय दलको ह्वीप नलाग्ने संविधानको धारा अनुरुपको सरकार गठनमा हामी आफ्नै नेतृत्वमा सरकार गठनमा लागेका छौँ,” राईले भने, “यस्तोमा हाम्रो हस्ताक्षर दुरुपयोग भएको छ । हामी केदार कार्कीलाई मुख्यमन्त्रीमा समर्थन गछौँ र उहाँलाई नै मुख्यमन्त्री बनाउँछौँ ।”