विराटनगर । कोसी प्रदेशको मुख्यमन्त्रीमा नेकपा (माओवादी केन्द्र) संसदीय दलका नेता इन्द्र आङ्बोलाई अघि सार्ने केन्द्रीय सत्ता गठबन्धनको निर्णयप्रति नेपाली कांग्रेसका केही सांसदले असन्तुष्टि जनाएका छन् । नेता शेखर कोइराला पक्षधर प्रदेशसभा सदस्यले आङ्बोलाई मुख्यमन्त्रीमा समर्थन गर्न नसकिने चेतावनी दिएका हुन् ।

कोसीको मुख्यमन्त्रीमा कांग्रेसका केदार कार्कीलाई अघि सार्नुपर्नेमा उनीहरूले जोड दिएका थिए । तर, बिहीबार काठमाडौंमा बसेको गठबन्धनमा आबद्ध दलका नेताको बैठकबाट आङ्बोलाई मुख्यमन्त्री बनाउने निर्णय गरिएको हो ।

कार्की मुख्यमन्त्री बन्नुपर्ने पक्षमा रहेका कांग्रेसका नौ प्रदेशसभा सदस्यले गठबन्धनको निर्णयप्रति असन्तुष्टि जनाएका छन् । कोसीका पूर्वमन्त्री एवं कांग्रेसका एक सांसदले बाह्रखरीसित भने, “आङ्बोलाई समर्थन गर्नेबारे थप छलफल हुनेछ । हामी उहाँ (इन्द्र आङ्बो)लाई समर्थन गर्ने पक्षमा छैनौँ । कम्तीमा एउटा प्रदेशमा हाम्रो समूहको मुख्यमन्त्री हुनुपर्छ भन्नेमा हामी आफ्नै पार्टीभित्र पनि प्रस्ट छौँ ।”

कोइराला पक्षधर सांसदले सरकार गठन गर्न नेकपा (एमाले)का प्रदेशसभा सदस्यसँग छलफल नै गर्ने भएका छन् । छलफल गर्न तयार रहेको यसअघि नै एमाले संसदीय दलले जनाएको थियो ।

बिहीबार विराटनगरमा आयोजित एक कार्यक्रममा कामचलाउ सरकारका मुख्यमन्त्री हिक्मत कार्कीले पनि संस्थागत निर्णय गरेर आउने दलका सांसदसँग छलफल गर्न कठिनाइ नभएको बताए । उनले भने, “हामीले मध्यावधिमा नजाने, बरू सहकार्य गरेर अघि बढ्ने विषयमा सकारात्मक रहेको बताइरहेका छौँ । आज पनि त्यही भन्छौँ ।”

संविधानको धारा १६८ को उपधारा ५ बमोजिम सरकार गठन गर्न प्रदेश प्रमुख पर्शुराम खापुङले शुक्रबार (भोलि) बेलुका ५ बजेसम्मको समय दिएका छन् । यो उपधाराअनुसार सरकार गठन गर्न बहुमत पुर्‍याउन सक्ने सांसदले मुख्यमन्त्रीमा दाबी गर्न सक्छन् ।

उद्धव थापा नेतृत्वको सरकार दुईपटक सर्वोच्च अदालतबाट बदर भएपछि कांग्रेसमा विकल्प खोज्न माग गरिएको थियो । तर, केन्द्रीय नेतृत्वले कांग्रेस संसदीय दलका नेताको साटो अरूलाई नै दिने रणनीतिअनुरूप माओवादीको भागमा मुख्यमन्त्री पारिदिएको एक सांसदले बताए । ती प्रदेशसभा सदस्यले भने, “हामी अब प्रदेशमा थप छलफल गर्दै छौँ ।”

कोसीमा सरकार गठन गर्न ४७ सांसदको समर्थन आवश्यक हुन्छ । अहिले नेकपा (एमाले)का (उपसभामुखसहित) ४०, कांग्रेसका २९, माओवादी केन्द्रका १३, राष्ट्रिय प्रजातन्त्र पार्टी (राप्रपा)का ६ र जनता समाजवादी पार्टी (जसपा)का एक प्रदेशसभा सदस्य छन् । गठबन्धनसँग बहुमत पुग्ने ४७ संख्या छ । तर, उपधारा ५ बमोजिम सरकार गठन गरिँदा ‘ह्वीप’ नलाग्ने भएकाले आङ्बोको पक्षमा मत नदिने कांग्रेसका असन्तुष्ट सांसदको भनाइ छ ।

कांग्रेस सांसद केदार कार्कीले सरकार गठनका विषयमा एमाले  नेतासँग पनि छलफल गरिने बताए । “गठबन्धनले गरेको निर्णयबारे हामीलाई जानकारी छैन,” उनले भने ।