काठमाडौं । जुड बेलिंघमको दुई गोलप्रेरित रियाल मड्रिडले स्पेनिस ला लिगामा ओसासुनाविरुद्ध ४–० को सहज जित निकालेको छ ।

शनिबार घरेलु मैदान सान्टियागो बर्नबेउमा सहज जित दिलाउन बेलिंघमले दुई गोल गर्दा भिनिसियस जुनियर र जोसुलाले समान एक गोल गरे ।

नवौँ मिनेटमा बेलिंघमले गोल गर्दै रियाललाई अग्रता दिलाएका थिए । बेलिंघमको गोलबाट पहिलो हाफमा १–० को अग्रता बनाएको रियालले दोस्रो हाफमा तीन गोल थप्यो ।

५४औँ मिनेटमा बेलिंघमले नै रियालको अग्रता दोब्बर पारे । यसै समरमा रियाल भित्रिएका बेलिंघमले ला लिगामा गरेको यो आठौँ गोल हो । ६५औँ मिनेटमा भिनिसियसको गोलमा रियालले अग्रतालाई ३–० मा पुर्‍यायो । त्यसको पाँच मिनेटपछि जोसुलाले गोल गरेपछि रियालले ४–० को सहज जित पक्का सुनिश्चित गर्‍यो ।

जितसँगै नौ खेलबाट २४ अंक जोडेको रियाल तालिकाको शीर्ष स्थानमा उक्लिएको छ । ला लिगामा रियालको यो आठौं जित हो । रियाललाई पछ्याइरहेका जिरुनाले समान खेलबाट २२ अंक जोडेको छ । अर्को चिर–प्रतिद्वन्दी बार्सिलोना भने आठ खेलमा २० अंकसहित तालिकाको तेस्रो स्थानमा छ ।

लिगमा पाँचौँ हार बेहोरेको ओसासुना भने तालिकाको १०औँ स्थानमा छ ।