काठमाडौं । अस्ट्रेलियाली प्रतिनिधिसभाका सभामुख डिक मिल्टनको नेतृत्वमा एक संसदीय प्रतिनिधिमण्डलले मंगलबारदेखि नेपाल भ्रमण गर्दै छ । उनीहरू यही असोज २० गतेसम्म नेपालमा रहने काठमाडौंस्थित अस्ट्रेलियाली दूतावासले जनाएको छ ।

“अस्ट्रेलिया र नेपालबीच रहिआएको दौत्यसम्बन्धको ६ दशकमा अस्ट्रेलियाली संसदीय टोलीको यो पहिलो नेपाल भ्रमण हो र यस भ्रमणले हाम्रा दुई देशहरूबीचको सम्बन्ध सुदृढ हुँदै गएको देखाउँछ,” दूतावासद्वारा मंगलबार जारी विज्ञप्तिमा उल्लेख छ ।

भ्रमण टोलीमा प्रतिनिधिसभाका सांसदहरू लिब्वी कोकर र जोआन रियान र अस्ट्रेलियाली संसद्को माथिल्लो सदन सिनेटका सदस्यहरू डीन स्मिथ र राल्फ वाबेट सहभागी छन् ।

भ्रमण टोलीले नेपालको प्रतिनिधिसभाका सभामुख देवराज घिमिरे र राष्ट्रियसभाका अध्यक्ष गणेशप्रसाद तिमिल्सिनासित भेटवार्ता गर्ने दूतावासले जनाएको छ ।

“यस भ्रमणले अस्ट्रेलिया र नेपालबीचको सम्बन्धलाई थप सबल बनाउने र संसदीय सम्पर्कहरूलाई थप मजबुत बनाउनेछ । भ्रमणका अवसरमा दुई देशका प्रतिनिधिहरूले संसदीय प्रजातान्त्रिक अभ्यासहरू, संघीय व्यवस्थाको सञ्चालन र तीनै तहका सरकारमा सुशासन प्रवर्द्धन गर्ने विषयहरूमा अनुभव आदानप्रदान गर्नेछन्,” विज्ञप्तिमा उल्लेख छ ।

शिक्षा, विकास सहयोग, वाणिज्य र लगानीजस्ता क्षेत्रमा अस्ट्रेलिया र नेपालबीच रहेको जनता र सरकारस्तरीय सम्बन्धलाई यो भ्रमणले अझ मजबुत बनाउने दूतावासले विश्वास व्यक्त गरेको छ ।

भ्रमण टोलीले अस्ट्रेलियाको सहयोगमा सञ्चालित स्थानीय शासन सबलीकरण कार्यक्रम, जलवायु परिवर्तनले ल्याएका चुनौती र यसको प्रतिकार्यका काम, साना किसानलाई प्रदान गरिएका सहयोग र अटिजमलगायत स्नायु विकाससम्बन्धी चुनौती झेलिरहेका व्यक्तिहरूलाई प्रदान गरिने सेवाका बारेमा जानकारी लिनेछ ।