काठमाडौं । प्रमुख प्रतिपक्ष दल नेकपा (एमाले)का महासचिव शंकर पोखरेलले सत्तारुढ दलका नेताहरू आफैँ जेल जाने बताएका छन् ।

सरकारले एकपछि अर्को भ्रष्टाचारको काण्ड छानबिन गर्ने बताइरहेका बेला उनले सत्तारुढ दलका नेताहरूको शासकीय चरित्रनै भ्रष्टाचार आएको आरोप लगाउँदै उनीहरूनै जेल जाने जिकिर गरे । पार्टीको गण्डकी प्रदेश कमिटिको प्रथम अधिवेशनलाई सोमबार पोखरामा उद्घाटन गर्दै उनले एमाले सधैँ सुशासनको पक्षमा रहेको दाबी समेत गरे ।

महासचिव पोखरेलले सत्तारुढ गठबन्धनका नेताहरू भ्रष्टाचारका हिमायती रहेको समेत पटकपटक दोहोर्‍याए । उनले पार्टी अध्यक्ष केपी ओली नेतृत्वको सरकारले मुलुकमा विकास र समृद्धिको लहर ल्याएको पनि बताए ।

महासचिव पोखरेलले भने, "जेल जाने काम भनेको सत्ताको नेतृत्व गरिरहेको गठबन्धनका नेताहरूनै जेल जाँदैछन् एमाले होइन । किनकी एमाले सदैव भ्रष्टाचारको विरुद्धमा छ । एमाले सुशासनको पक्षमा छ । त्यस अर्थमा जतिजति घटनाका छानविन हुँदैछन् । अन्त्यमा जेल जाने काम सत्ता गठबन्धनको हुनेछ । किनकी उनीहरू भ्रष्टाचारका हिमायती हुन् । भ्रष्टाचार उनीहरूको शासकीय चरित्र हो भन्ने कुरालाई तपाईं, हामी सबैले बुझ्न जरुरी छ भन्ने कुरा म राख्न चाहन्छु । जतिबेला हाम्रो पार्टी अध्यक्ष प्रधानमन्त्रीका रूपमा रहनु भयो, देशव्यापी रूपमा विकास र समृद्धिका लहरहरू सुरु भए । यही पोखरामा हामीले दोस्रो अन्तर्राष्ट्रिय विमानस्थल बनाउने कामको नेतृत्व गर्‍यौं ।"