काठमाडौं । चीनको हाङझाउमा जारी १९औँ एसियाली खेलकुदअन्तर्गत महिला भलिबलमा नेपाली टिमले लगातार दोस्रो हार बेहोरेको छ ।

सोमबार सम्पन्न समूह ‘सी’को खेलमा नेपाली टिम दक्षिण कोरियासँग ३–० को सोझो सेटमा पराजित भएको हो । दक्षिण कोरियाविरुद्ध पहिलो सेट प्रतिस्पर्धात्मक बने पनि त्यसपछिको सेटमा भने नेपालले बलियो चुनौती प्रस्तुत गर्न सकेन ।

पहिलो सेट दक्षिण कोरियाले २५–२१ ले जितेको थियो । यसपछिका दुई सेटमा भने दक्षिण कोरियाले २५–१४, २५–११ को सोझो स्कोरमा जित निकाल्यो । लगातार दोस्रो हार बेहोरेको नेपाल समूह चरणबाटै बाहिरिएको छ ।

यसअघि, नेपाल पहिलो खेलमा भियतनामसँग ३–० को सोझो सेटमा पराजित भएको थियो । नेपालविरुद्धको जितसँगै कोरिया भने अन्तिम–८ मा प्रवेश गरेको छ ।