विराटनगर । नेकपा (एमाले) कोसी प्रदेशको राजधानी विराटनगरमा जारी प्रथम अधिवेशनमा राजनीतिक, आर्थिक र सांगठनिक प्रतिवेदनमाथि छलफल सुरु भएको छ । अधिवेशन शुक्रबार पार्टी अध्यक्ष केपी शर्मा ओलीले उद्घाटन गरेका थिए । अधिवेशनले शनिबार नै नयाँ नेतृत्व चयन गर्नेछ । प्रतिवेदनहरूमाथि छलफल गर्न विभिन्न सातवटा समिति बनाइएको छ ।
 
बन्दसत्र सुरु भएसँगै पार्टीका प्रदेश अध्यक्ष तुलसी प्रसाद न्यौपानेले राजनीतिक र सांगठनिक प्रतिवेदन पेस गरेका छन । आर्थिक प्रतिवेदन पार्टीका आर्थिक विभाग प्रमुख पुष्प कँडेलले प्रस्तुत गरेका छन् । प्रतिवेदनमाथि सुझाव तथा संशोधनहरू परे त्यसलाई पारित गराएर नेतृत्व चयन प्रक्रिया सुरु हुने अध्यक्ष न्यौपानेले बताए ।

अध्यक्ष पदमा विनोद ढकाल र घनश्याम खतिवडाले आफ्नो दाबी प्रस्तुत गरेका छन् । अध्यक्ष न्यौपाने र उपाध्यक्ष टिकाराम चेम्जोङले भने दाबी छाडेका छन् । केन्द्रीय नेतृत्वले सहमतिमा समिति गठन गर्न आग्रह गरका छन् । बन्दसन्त्र संचालन गर्न कोसी इन्चार्ज रघुवीर महासेठको संयोजकत्वमा ११ सदस्यीय अध्यक्ष मण्डल बनाइएको छ । यसमा पार्टीका स्थायी कमिटी सदस्य तथा केन्द्रीय सदस्यहरू छन् । 

अधिवेशन आयोजक मूल समितिले जनाएअनुसार अध्यक्ष मण्डलमा अग्नि खरेल, शेरधन राई, हिक्मतकुमार कार्की, डा.शिवमाया तुम्बाहाम्फे, राजेन्द्र गौतम, भगवती चौधरी, जगदिश कुसियैत, राम राना मगर, पर्शुराम मेघी गुरुङ र सुनिता बराल सदस्य छन् ।

एमाले प्रदेश अधिवेशनमा १३७ पालिका, २३ जनवर्गीय संगठन, दलित, मजदुर समेत गरी ९९७ जना प्रतिनिधि सहभागी छन् । अधिवेशनले पाँचजना पदाधिकारीसहित २१५ सदस्यीय कमिटी चयन गर्नेछ ।
 
यसैबीच, आज बिहान विराटनगरमा हावाहुरीसहित परेको वर्षाका कारण समूहगत छलफल भने प्रभावित भएको छ ।