![इयान एन्ड्रयु गिलान ललितपुर सिटी एफसीको मुख्य प्रशिक्षक](https://12khari.top/uploads/posts/ian-1695969964.png)
काठमाडौं । नेपाल सुपर लिग (एनएसएल) को दोस्रो संस्करणका लागि ललितपुर सिटी एफसीले अस्ट्रेलियाका इयान एन्ड्रयु गिलानलाई मुख्य प्रशिक्षकमा नियुक्त गरेको छ ।
ललितपुरले शुक्रबार सामाजिक सञ्जालमार्फत गिलानलाई मुख्य प्रशिक्षकको जिम्मेवारी सुम्पिएको जनाएको हो । उनले यसअघि सन् २०२१ देखि इन्डोनेसियाको पिसीस मेमाराङको मुख्य प्रशिक्षक र टेक्निकल डाइरेक्टरको भूमिकामा काम गरेका थिए ।
गिलानसँग अस्ट्रेलिया, स्कटल्यान्ड, मलेसिया, फिलिफिन्स र इन्डोनेसियामा काम गरेको अनुभव छ । ललितपुरले यसअघि बिहीबार नेपाली राष्ट्रिय टिमका रक्षक अनन्त तामाङलाई मार्की खेलाडीको रूपमा सार्वजनिक गरेको थियो ।
एनएसएलको दोस्रो संस्करण मंसिर ८ गतेबाट काठमाडौंको दशरथ रंगशालामा आयोजना हुँदै छ । प्रतियोगिताको दोस्रो संस्करणका लागि अक्सन आगामी शनिबार हायात होटेलमा सञ्चालन हुँदै छ ।
एनएसएसलको दोस्रो संस्करणमा कुल ९ टिमले प्रतिस्पर्धा गर्दै छन् । यसअघि १० टिमले खेल्ने तय भए पनि अन्तिम समयमा विराटनगर सिटी एफसीले नखेल्ने भएको हो ।