काठमाडौं । नासाको ओसिरिस–रेक्स मिसनको अन्तरिक्षयान आइतबार पृथ्वीको वायुमण्डलमा प्रवेश गर्दै छ । तीव्र गतिमा पृथ्वीतर्फ आउँदै गर्दा यसमा आगोका झिल्का देखिने छ ।

तर, तातोबाट जोगाउने सिल्ड र प्यारासुट खुलेर गति सुस्त हुँदै यो अमेरिकाको उटाह राज्यको पश्चिमी मरुभूमिमा अवतरण हुने छ । अवतरण सफल भएमा यो नासाको विशेष सफलता हुने छ ।

यो यानको क्याप्सुलमा ‘बेन्नु’ एस्टेरोइड अथवा क्षुद्रग्रहबाट संकलन गरिएको थोरै धुलोको नमुना छ । करिब ५०० मिटर अग्लो पहाड आकारको अन्तरिक्ष चट्टान ‘बेन्नु’ले पृथ्वी र जीवनको अस्तित्वबारे थप नयाँ कुरा सतहमा ल्याउने ठानिएको छ ।

ओसिरिस–रेक्स मिसन सन् २०१६ को सेप्टेम्बर ८ मा फ्लोरिडाको केप क्यानाभेरल स्पेस फोर्स बेसबाट प्रक्षेपण भएको थियो । सन् २०१८ मा बेन्नुको अक्षमा पुगेको यानले उचित ठाउँबाट त्यहाँको धुलो वा माटोको नमुना संकलन गर्न दुई वर्ष त्यसको परिक्रमा गरेको थियो ।

सन् २०२० को अक्टोबर २० मा नमुना संकलन गरेको थियो । सन् २०२१ को मेमा यानले पृथ्वीतर्फ फिर्ता आउने यात्रा थालेको थियो । अहिले यो अन्तरिक्ष यान वायुमण्डलमा फेरि प्रवेश गरेर असफल अवतरण गरी नमुना उपलब्ध गराउन सक्ने जटिल समयमा पुगेको छ ।

करिब ७ वर्षको ६.४ अर्ब किलोमिटरको ओहोरदोहर दुरी पार गरी आइतबार स्थानीय समयअनुसार ६ बजेर ४२ मिनेटमा अवतरण हुने बताइएको छ । क्याप्सुल सुरक्षितरूपमा जमिनमा पुगेपछि यसलाई टेक्सासको जोन्सन स्पेस सेन्टरमा पठाइने छ । त्यहाँ नै यसले बेन्नु क्षुद्रग्रहबाट ल्याएको नमुनाको अध्ययन हुने छ ।

बेन्नु क्षुद्रग्रह करिब साढे ४ अर्ब वर्षअघि सौर्यमण्डलको उत्पत्ति भएका बेला बनेको सबैभन्दा पुरानो क्षुद्रग्रहमध्येको हो । यसमा विभिन्न खनिज, तत्त्व र पानीसमेत रहेको अनुमान गरिएको छ ।