काठमाडौं । काइलियन एमबाप्पे र अक्रफ हाकिमीको गोल फ्रेन्च क्लब पेरिस सेन्ट जर्मन (पीएसजी)ले यूईएफए च्याम्पियन्स लिग २०२३–२४ को आफ्नो पहिलो खेलमा जर्मन क्लब बोरुसिया डर्टमन्डलाई २–० ले हराएको छ ।
घरेलु मैदान पार्क डेस प्रिन्समा भएको खेलमा पीएसजीले दुवै गोल दोस्रो हाफमा गरेको हो । ४९औँ मिनेटमा प्राप्त पेनाल्टीलाई सदुपयोग गर्दै एमबाप्पेले पीएसजीलाई अग्रता दिलाएका थिए । एमबाप्पेले नै १८ यार्ड बक्सभित्रबाट गरेको प्रहार डर्टमन्डका निकलास सुलको ह्यान्ड भएपछि पीएसजीले पेनाल्टी पाएको थियो । जसमा एमबाप्पेले कुनै गल्ती गरेनन् ।
त्यसको नौ मिनेटपछि मोरोक्कोका रक्षक हाकिमीले गोल गर्दै पीएसजीको अग्रता दोब्बर पारेका थिए । जितसँगै तीन अंक जोडेको पीएसजी समूह ‘एफ’को शीर्ष स्थानमा उक्लिएको छ । पहिलो खेलमा हार बेहोरेको डर्टमन्ड तालिकाको पुछारमा छ ।
च्याम्पियन्स लिगको ‘ग्रु अफ डेथ’ मानिएको यस समूहमा पीएसजी र डर्टमन्डसँगै इंग्लिस क्लब न्युक्यासल युनाइटेड र इटालियन क्लब एसी मिलान छन् ।
मंगलबारै भएको अर्को खेलमा एसी मिलान र न्युक्यासलले गोलरहित बराबरी खेल्दै अंक बाँडे । बराबरीसँगै समान एक अंक जोडेका मिलान र न्युक्यासल क्रमशः तालिकाको दोस्रो र तेस्रो स्थानमा छन् ।
