काठमाडौं । एसिया कप–२०२३ मा भारतका ओपनर शुभमन गिल सबैभन्दा धेरै रन बनाउने ब्याटर बनेका छन् ।

भारतलाई प्रतियोगिताको उपाधि दिलाउन महत्त्वपूर्ण भूमिका खेलेका गिलले ६ खेलमा कुल ३०२ रन बनाए । यसक्रममा उनले एक शतक र दुई अर्धशतक प्रहार गरे । गिलले नेपाल र पाकिस्तानविरुद्ध अर्धशतक बनाएका थिए ।

यस्तै, सुपर फोरमा बंगलादेशविरुद्ध उनले शतक प्रहार गरेका थिए । गिलले प्रतियोगिताभर ३५ चौका र ६ छक्का प्रहार गरे ।

सबैभन्दा धेरै रन बनाउने खेलाडीको दोस्रो स्थानमा श्रीलंकाका कुशल मेन्डिस छन् । मेन्डिसले ६ खेलमा तीन अर्धशतकसहित २७० रन बनाए । यस्तै, तेस्रो स्थानमा पनि श्रीलंकाकै सदिरा समराविक्रमा छन् । उनले प्रतियोगितामा दुई अर्धशतकसहित २१५ रन जोडे ।

यो सूचीको चौँथो स्थानमा रहेका पाकिस्तानी कप्तान बाबर आजमले पाँच खेलमा २०७ र पाँचौ स्थानमा रहेको पाकिस्तानकै ब्याटर मोहम्मद रिजवानले पाँच खेलमा १९५ रन बनाए । प्रतियोगितामा बाबरले एक शतक प्रहार गर्दा रिजवानले दुई खेलमा अर्धशतक बनाएका थिए ।