काठमाडौं । एसिया कप–२०२३ को फाइनलमा आइतबार साविक विजेता श्रीलंकालाई प्रतियोगिताकै सबैभन्दा सफल टोली भारतले चुनौती प्रस्तुत गर्दै छ ।

सात उपाधिसहित प्रतियोगिताको सबैभन्दा सफल टोली रहे पनि भारतले सन् २०१८ यता आईसीसी र एसीसीका कुनै पनि ठूलो प्रतियोगिताको उपाधि जित्न सकेको छैन । 

आईसीसी वरीयताको आठौँ स्थानको श्रीलंकाले छनोट खेल्दै एकदिवसीय विश्वकपका स्थान बनाए पनि ‘डार्क हर्स’ को छवि बनाएको छ ।

भारतले समूह ‘ए’ को र श्रीलंका समूह ‘बी’ विजेताको रूपमा सुपर फोरको यात्रा तय गरेका थिए । सुपर फोरमा भारतलाई २१३ मा अल आउट गरे पनि श्रीलंका ४१ रनले पराजित भएको थियो ।

घरेलु टिम श्रीलंका एसिया कपमा सबैभन्दा धेरै फाइनल खेल्ने टिम हो । श्रीलंकाले हालसम्म १२ पटक फाइनल खेलेको छ । जसमध्ये ६ उपाधि जितेको श्रीलंका आज उपाधिसहित प्रतियोगिताको सबैभन्दा धेरै उपाधि जित्ने टिमको रूपमा भारतसँग बराबरी गर्न चाहन्छ ।

भारतले १० पटक फाइलन खेलेको छ । सुपर फोरबाटै बाहिरिएका पाकिस्तानले पाँच र बंगलादेशले तीन पटक फाइनल खेलेका छन् ।

एकदिवसीय अन्तर्राष्ट्रिय क्रिकेटमा यी दुई टिमबीच हालसम्म १६६ खेल भएका छन् । जसमध्ये भारतले ९७ खेल जितेको छ । श्रीलंकाले ५७ खेलको नतिजा आफ्नो पक्षमा पारेको छ । यस्तै, ११ खेल नजिताविहीन र एक खेल ‘टाई’ भएको छ ।

कोलम्बोस्थित आर प्रेमादसा रंगशालामा हुने खेल नेपाली समयअनुसार दिउँसो ३ः१५ बजेदेखि सुरु हुनेछ ।