काठमाडौं । नेपाल धितोपत्र बोर्ड (सेबोन)का अध्यक्ष रमेश कुमार हमालले नयाँ स्टक एक्स्चेन्ज ल्याउन असफल भएको स्वीकार गरेका छन् ।

नेपाल आर्थिक पत्रकार संघ (नाफिज)ले शुक्रबार आयोजना गरेको ‘आर्थिक मन्दीमा पुँजीबजारः सम्भावना र चुनौती’ अन्तर्क्रिया कार्यक्रममा बोल्दै अध्यक्ष हमालले आफू असफल भएको स्वीकारे । उनले नयाँ स्टक एक्सचेन्ज ल्याउने भनेको लामो समय प्रयास गरे पनि बोर्ड असफल भएका बताए ।

पुँजीबजारमा प्रतिष्पर्धा गर्न नयाँ स्टक एक्सचेन्ज ल्याउन सबै प्रक्रिया पुर्‍याएर तीन कम्पनीको आवेदन परेको १२/१३ महिनाको अवधि हुँदा पनि स्वीकृत गर्न नसकेको भन्दै उनले धितोपत्र बोर्ड स्टक एक्सचेन्ज ल्याउन असफल भएको बताए ।

सरकारसँग जुध्न गाह्रो भएको भन्दै उनले विश्वको पुँजीबजारसँग प्रतिष्पर्धा गर्ने नयाँ स्टक एक्सचेन्ज ल्याउन खोजेको बताए । त्यस्तो भएमात्रै पुँजीबजारको सम्पूर्ण इकोसिस्टम सुधार हुने बताउँदै उनले बोर्डको सरकारी स्टक एक्सचेन्जलाई सिध्याउने भन्ने कुनै पनि मनसाय नभएको स्पष्ट पारे ।

नेपालको कुनै पनि आर्थिक क्षेत्रमा मनोपोली हुन नहुने भन्दै मनोपोली भए विकासको बाटोमा अगाडि बढ्न नसकिने उनले बताए । पछिल्लो समय हाइड्रो र रियल सेक्टर सुधार भइरहेको भन्दै अध्यक्ष हमालले राइट सेयरमा केही गर्न खोजिरहेको बताए ।

सेबोनको शुल्क घटेपछि मात्रै ब्रोकर कम्पनीको कमिसन घटाइने भन्दै उनले पहिला सेबोनले लिने शुल्क घटेपछि मात्रै ब्रोकर कमिसन घट्ने बताए । ब्रोकर कम्पनी पुँजीबजारको मुटु भएको उनको भनाइ छ ।