काठमाडौं  । पारामाउन्ट मोटर्सले नेपाली बजारमा ‘एमजी कमेट ईभी’ र ‘एमजी ४ ईभी’ सार्वजनिक गरेको छ । कम्पनीले आइतबार काठमाडौं एक कार्यक्रमको आयोजना गर्दै दुई मोडलका विद्युतीय सवारीसाधन सार्वजनिक गरेको हो ।

एमजी कमेट ईभी भारतमा बनेको हो । यसले सिङ्गल चार्जमा २३० किलोमिटरको रेन्ज दिन्छ । यसमा १७.३ किलोवाटआवरको ब्याट्री र ३१.२६ किलोवाटको मोटर छ ।

एमजी कमेट ईभीमा आईपी६७ रेटेड ब्याट्री, डुअल फ्रन्ट एयर ब्याग, पछाडिपट्टि पार्किङ सेन्सर र सबै यात्रुको लागि सिट बेल्टहरु राखिएको छ । सुविधा र सहजताको लागि एमजी कमेट ईभीमा एलसीडी स्क्रिन, रिमोट सेन्ट्रल किङ, म्यानुअल एसी र हिटर जस्ता सुविधाहरु रहेका छन् ।

एमजी कमेट ईभीको बजार मूल्य १७ लाख ९९ हजार छ । एमजी कमेट ईभी प्ले र पेस गरेर दुईवटा भेरियन्टमा उपलब्ध छ । एमजी कमेट ईभीको हाइ भोल्टेज कम्पोनेन्टमा एक लाखसम्म तीन वर्ष र हाइभोल्टेज ब्याट्रीमा एक लाख २० हजार किलोमिटरको आठ वर्ष वारेन्टी छ ।

यस्तै, एमजी ४ ईभी कम्फर्ट र लक्जरी गरेर दुई भेरियन्टमा उपलब्ध छ । एमजी कम्फर्ट ईभीमा ५१ किलोवाटआवर र ९९ किलोवाटको मोटर छ । एमजी लक्जरी ईभीको ब्याट्री क्षमता ९९ किलोवाटआवर र १५० किलोवाट छ ।

एमजी ४ ईभीको मूख्य आकर्षण भनेको इन्डिभिजुअल सस्पेन्सन र रियर ह्विल ड्राइभ हो । यही मूल्यमा नेपाली बजारमा उपलब्ध विद्युतीय सवारीको सेग्मेन्टमा पहिला फिचर रहेको कम्पनीले जनाएको छ ।

एमजी ४ ईभीले सिङगल चार्जमा ४३५ किलोमिटरसम्मको रेन्ज दिन्छ । राम्रो ह्यान्ड्लिङ र ट्रयाक्सनको लागि एमजी ४ ईभीमा रियल ह्विल लेआउट राखिएको छ ।

रियर आइसोफिक्स, फ्रन्ट साइड एयर ब्याग, टायर प्रेसर मनिटरिङ सिस्टम, सिट बेल्ट रिमाइन्डर जस्ता फिचरहरु छन् । सहजताको लागि मोबाइल फोन ब्लुटुथ की, पाँचवटा ड्राइभिङ मोड जस्ता फिचरहरु उपलब्ध छ ।

एमजी ४ ईभीको लागि हाई भोल्टेज ब्याट्रीमा एक लाख ५० हजार किलोमिटरसम्म वा आठ वर्ष र हाई भोल्टेज कम्पोनेन्टमा एक लाख किलोमिटरसम्म वा तीन वर्षको वारेन्टी छ । एमजी कम्फर्ट ईभीको मूल्य ४१ लाख ४९ हजार र एमजी लक्जरी ईभीको मूल्य ५८ लाख ९९ हजार रुपैयाँ रहेको छ ।

दुवै ईभीमा टचस्क्रिन इन्फोटेनमेन्ट सिस्टम, रिभर्सिङ क्यामरा र आवश्यक सेफ्टी फिचर छन् । दुवैमा एमजीले आफ्टर सेल्स सर्भिस र एक वर्षको वारेन्टी प्रदान गरेको छ ।

सार्वजनिक कार्यक्रममा बोल्दै पारामाउन्ट मोटर्सका जनरल म्यानेजर सचिन अर्यालले दुई विद्युतीय सवारी भित्र्याउन पाउँदा उत्साहित भएको बताए । “नेपाली बजारमा यी दुई विद्युतीय सवारीसाधन भित्र्याउन पाउँदा हामी अत्यन्तै उत्साहित छौँ,” उनले भने, “स्टाइलिस, प्राक्टिकल र आफ्नो बजेटमा सवारीसाधन किन्न चाहने ग्राहकका लागि यी दुई मोडेल उपयुक्त हुन्छन ।”