काठमाडौं । नेपाली राष्ट्रिय क्रिकेट टिमका ओपनर ब्याटर कुशल भुर्तेलले एसिया कपमा भारतसँग खेल्न सहज महसुस गरेको बताएका छन् । 

प्रतियोगिताको पहिलो खेलमा पाकिस्तानविरुद्ध आठ रनम आउट भएका कुशलले दोस्रो खेलमा भारतविरुद्ध २५ बलमा तीन चौका र दुई छक्कासहित ३८ रन बनाएका थिए । भारतविरुद्ध ओपनिङमा कुशल आक्रामकरूपमा प्रस्तुत भएपछि नेपालले ९.४ ओभरमा ६५ रनको उत्कृष्ट सुरुआत गरेको थियो । एसिया कपको अनुभव बाँड्दै कुशलले पाकिस्तानसँगको खेलभन्दा आफूले भारतसँगको खेलमा सहज महसुस गरेको बताए ।

“पाकिस्तानसँगको खेलपछि हामी सबैजना भारतसँग खेल्न आतुर थियौँ । तर, जति पाकिस्तानसँगको खेलका लागि उत्साहित थिएँ, त्यति भारतसँगको खेलका लागि थिइनँ । पाकिस्तानसँग खेलिसकेपछि भारतसँग खेल्न नर्मल नै लाग्यो,” कुशलले भने, “भारतसँग हामीले अझै २०–३० रन बनाउँन सक्थ्यौँ । नेपाली टिमले भारतको ड्रेसिङ रुममा गएर मोमेन्टहरू सेयर गर्‍यौँ । त्यो चाहिँ एसिया कपमा हाम्रो बेस्ट मोमेन्ट थियो । समग्रमा अनुभव राम्रो रह्यो । अगाडि खेलहरू छन् । यो अनुभवले आगामी दिनमा सहयोग गर्छ जस्तो लाग्छ ।”

कुशलले एसिया कप खेल्नुभन्दा पनि छनोट हुँदा धेरै खुसी लागेको बताए । “समग्र अनुभव राम्रो रह्यो । एसिया कप खेल्यौँ भन्दा पनि एसिया कपमा छनोट हुँदा धेरै खुसी लागेको थियो । पहिलोपटक एसिया कप खेल्दै थियौँ । पहिलोपटक एसिया कपमा देशको प्रतिनिधित्व गर्न पाउँदा प्राउड फिल भइरहेको थियो । पहिलो खेलमा पाकिस्तानविरुद्ध मसँग हामी सबैजना उत्साहित थियौँ । जस्तो सोचेको थियौँ, जस्तो तयारी थियो त्यस्तो पहिलो खेलमा भएन । तर, हामी त्यो भन्दा राम्रो गर्न सक्छौँ भन्ने थाहा थियो । पाकिस्तान भ्रमण पनि राम्रो भयो । हामीले पहिलोपटक त्यति सुरक्षामा खेलेका थियौँ,” कुशलले भने ।

भारतविरुद्ध कुशलले मोहम्मद सिराजले गरेको ५.३ ओभरमा ९० मिटर लामो छक्का प्रहार गरेका थिए । सिराजलाई लामो छक्का प्रहार गर्दा कस्तो महसुस थियो भन्ने प्रश्न गर्दा कुशलले हाँस्दै भने, “९० मिटरमात्रै पो थियो । ग्राउन्ड बाहिरै पुगेको थियो, मैले त १०० मिटर प्लस होला भन्ने सोचेको थिएँ ।”