काठमाडौं । युरोपका २१ देशसहित विश्वका ७० भन्दा बढी देशमा बजार विस्तार गरेको विद्युतीय सवारी (ईभी) ब्रान्ड सेरेस नेपाली बजारमा भित्रिएको छ । सेरेस–३ मोडेलअन्तर्गत नेपालमा दुईवटा विद्युतीय गाडी भित्रिएका हुन् ।

एमएडब्ल्यू वृद्धि अटोकर्पले सेरेस ब्रान्डका विद्युतीय गाडी नेपाल भित्र्याएको हो । कम्पनीले भदौ २६ गतेदेखि हुने ‘नाडा अटोसो’मा औपचारिकरूपले गाडी सार्वजनिक गर्ने बताएको छ ।

कम्पनीले ‘गो लिमिटलेस ईभी एसयूभी’ स्लोगन राखेको एसयूभी ईभीले सहर मात्रै नभएर अन/अफ रोड, उबडखाबड भएको पहाडी बाटो र असमथल फाँट जहाँसुकै सहज यात्रा गर्न सकिने बताएको छ ।

बजार विस्तारका क्रममा नेपाल ७१औँ देश बनेको सेरेस ब्रान्डले हुवावे टेक्नोलोजीसँग मिलेर सन् २०२६ सम्म १० लाख गाडी उत्पादन गर्ने लक्ष्य राखेको छ । सिलिकन भ्यालीमा स्थापित सेरेस अटोमोबाइल कम्पनीले चीन, जापान र अमेरिकामा रिसर्च एन्ड डेभलपमेन्ट सेन्टर रहेको बताएको छ ।

सेरेसले उच्च ग्राउन्ड क्लियरेन्स र स्पष्ट नाइट भिजिबिलिटी भएको सेरेस–३ आफ्नो सेगमेन्टकै ठूलो एसयूभी बताएको छ ।

के–के छन् फिचर ?

सेरेस–३ अन्तर्गत ‘कम्फर्ट’ र ‘प्रिमियम’ गरी दुईवटा भेरियन्ट नेपाल भित्रिएका छन् । दुवै भेरियन्टमा लगभग सबैजसो समान फिचर रहेका छन् । गाडीमा दुईहजार ६५५ एमएमको ह्विलबेस रहेको छ । १९० एमएमको ग्राउन्ड क्लियरेन्स छ । ९९ किलोवाटको मोटर पावर रहेको गाडीमा ३०० एनएम टर्क छ ।

५२.७ किलोवाटको ब्याट्री रहेको सेरेस–३ ले ३५० किलोमिटरदेखि ४०५ किलोमिटर रेन्ज दिने कम्पनीको दाबी छ ।
६ वटा एयरब्याग रहेको गाडीमा दुईहजार ६५ किलोग्राम कुल तौल रहेको छ । 

गीत तथा भिडियोका लागि गाडीमा ६ वटा स्पिकर छन् भने, १०.२५ इन्चको टच स्क्रिन रहेको छ । 

स्ट्यान्डर्ड, कम्फर्ट र स्पोर्ट ड्राइभ मोड रहेको गाडीमा यात्रु र चालक दुवैका लागि इलेक्ट्रिकल्ली ६ वे एडजस्टेड सिट रहेको छन् ।

अन्य ईभी भन्दा फरक के छ ?

सेरेस–३ को डाइमेन्सन लामो र ठूलो हुनुका साथै यसमा ३६० डिग्रीको क्यामेरा रहेको छ । यो क्यामेरा र सेन्सरको मद्दतमा गाडीले चारैतिर ठोक्किन सक्ने स्थिति देखाउँनेछ ।

यसको अर्काे महत्त्वपूर्ण विशेषता भनेको ड्यास क्यामेरा रहेको छ । यो क्यामेराले गाडीको अगाडि रोडको भिडियोसमेत खिच्न सकिने कम्पनीले जनाएको छ ।

उच्च ग्राउन्ड क्लियरेन्स र नेपालका अन्य ईभीमा नरहेको स्पेयर टायर सेरेस–३ मा रहेको कम्पनीले बताएको छ ।
यसका साथै सहज तरिकाले राखिएको सेन्ट्रल कन्सोल गाडीको अर्काे विशेषता छ ।

वायरलेस मोबाइल चार्जिङ, एन्ड्रोइड अटो र एप्पल कारप्ले र नेभिगेसनका लागि अफलाइन म्यापजस्ता अत्याधुनिक सुविधा गाडीमा रहेका छन् ।

सेरेस–३ मा हायर सिट पोजिसनको एसयूभी अनुभव र सुपेरियर हेडरुम र लेगरुम रहेको कम्पनीले जनाएको छ ।
कठिन बाटोमा परस्कृत ह्यान्डलिङका लागि ३ स्टेयरिङ फिडब्याक मोड पनि सेरेस–३ मा उपलब्ध छ ।

मूल्य कति छ ?

कम्पनीले अहिले गाडीको मूल्य सार्वजनिक गरिसकेको छैन । नाडा अटो सोमा औपचारिकरूपमा सार्वजनिक गर्दै मूल्य पनि घोषणा गर्ने एमएडब्ल्यू वृद्धि अटोकर्पले बताएको छ ।

तर, सेरेस–३ कम्फर्टको मूल्य ५० लाख र प्रिमियमको मूल्य ५५ लाख रुपैयाँ आसपास हुन सक्ने अनुमान गरिएको छ । 

अत्याधुनिक फिचर र गुणस्तरसहित प्रतिस्पर्धी मूल्यमा गाडीले नेपालमा राम्रो बजार विस्तार गर्न सक्ने देखिएको छ ।