काठमाडौं । एसिया कप–२०२३ मा भारतविरुद्ध नेपालले कप्तान रोहितकुमार पौडेललाई तेस्रो विकेटको रूपमा गुमाएको छ ।
श्रीलंकाको क्यान्डीस्थित पालेकेले रंगशालामा टस हारेपछि ब्याटिङमा आएको नेपालले कप्तान रोहितलाई व्यक्तिगत पाँच रनमा गुमाएको हो । भारतका रविन्द्र जाडेजाले गरेको १९.६ ओभरमा कप्तान रोहित भारतीय कप्तान रोहित शर्माबाट क्याच भए ।
जारी खेलको २० ओभर समाप्त हुँदा नेपालले तीन विकेट गुमाएर ९३ रन बनाएको छ । नेपालले यसअघि पहिलो विकेटको रुपमा कुशल भुर्तेललाई व्यक्तिगत ३८ र भीम सार्कीलाई सात रनमा गुमाएको थियो । हाल क्रिजमा रहेको आसिफ शेख ३८ रनमा खेलिरहेका छन् ।
एसिया कपमा यसै संस्करणबाट ‘डेब्यु’ गरेको नेपाली टिमले सन् १९८३ र २०११ को विश्वकप विजेता समेत रहेको भारतविरुद्ध पहिलोपटक एकदिवसीय अन्तर्राष्ट्रिय मान्यताप्राप्त क्रिकेटमा प्रतिस्पर्धाका लागि उत्रिएको हो ।
आजको खेल जिते नेपाली क्रिकेटले नयाँ इतिहास रच्दै एसिया कपको ‘सुपर फोर’मा स्थान बनाउनेछ । सुपर फोरमा प्रवेशका लागि भारतमाथि आज जित्नै पर्ने दबाब छ ।
प्रतियोगितामा दुवै टिमको यो दोस्रो खेल हो । पहिलो खेलमा नेपाल पाकिस्तानसँग २३८ रनले पराजित भएको थियो । भारत–पाकिस्तानबीचको पहिलो खेल भने वर्षाका कारण रद्द भएको थियो ।