काठमाडौं । प्रमुख प्रतिपक्ष दल नेकपा (एमाले)का अध्यक्ष केपी शर्मा ओलीले भ्रष्टाचार नियन्त्रणका नाममा सरकारले राष्ट्रिय उद्योग र उद्योगपतिको गला रेट्ने काम गरिरहेको आरोप लगाएका छन् । शनिबार बुटवलमा पार्टीको लुम्बिनी प्रदेश अधिवेशनको उद्घाटन गर्दै उनले यस्तो बताएका हुन् ।

“अहिले भ्रष्टाचार नियन्त्रणको नाउँमा राष्ट्रिय उद्योग र राष्ट्रिय उद्योगपतिलाई, राष्ट्रिय पुँजीलाई गला थिच्ने, गला रेट्ने काम यो सरकारले गर्न खोजिरहेको छ,” उनले भने ।

सरकारले भ्रष्टारविरुद्धको अभियान भन्न नसुहाउने उनको टिप्पणी छ । “भ्रष्टाचारतिरको मेरो अभियान भन्न सुहाउँछ, भ्रष्टाचारविरुद्धको भन्ने छोड्देऊ,” ओलीले भने ।

उनले यती होल्डिङ्स, यती एयरलाइन्स भनेर कराएको भन्दै खोजी गर्न चुनौती दिए ।  गरिबले गरिखाएको सरकारले देख्न नसकेको उनको भनाइ छ ।

“यती, यती होल्डिङ्स, यती एयरलाइन्स भनेर कराउँछन् । खोजी गर न त यती एयरलाइन्सको भन्दै छु सरकारलाई । खोजी गर, राष्ट्रिय पुँजीविरोधी होऊ । एउटा गरिबले गरिखाएको तिमीहरू देख्न सक्दैनौ, तर गर न त,” ओलीको चुनौती छ ।

उनले यती होल्डिङ्स दरबारको पालादेखिकै खोजेर ल्याउनुपर्ने बताए । यतीलाई जग्गा नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ र नेपाली कांग्रेसका सभापति शेरबहादुर देउवा प्रधानमन्त्री हुँदाको समयमा दिइएको उनले सुनाए ।

“दरबारमार्गको भवन पुष्पकमल दाहाल प्रधामनमन्त्री हुँदा लिजमा दिएको हो । सोल्टी होटेलका छेउको जमिन दिने शेरबहादुर देउवा हुन्,” ओलीले भने, “खोजी गर न त कसकसले दियो, हामीसँग नाम लिन्छन् ।”

ओलीले ‘वाइडबडी पनि खोजेर जेल जाऊ’ भन्दै आक्रोश पोखे ।