काठमाडौं । नेपाल–चीन सीमास्थित तातोपानी नाकामा आठ वर्षपछि मानिस आवतजावत सुरु भएको छ ।

शुक्रबार लिपिङस्थित मितेरी पुलबाट नेपाली अध्यागमन कार्यालयको पास लिएका सिन्धुपाल्चोकका बासिन्दा चिनियाँ सुरक्षाकर्मीलाई जाँच गराएर चीनतर्फ प्रस्थान गरेसँग औपचारिक रूपमा नाकाबाट मानिस आवतजावत सुरू भएको हो ।

विसं २०७२ वैशाख १२ गतेको विनाशकारी भूकम्पपछि नेपाल–चीन बीचको सो नाका पूर्णरूपमा बन्द थियो ।

नेपाल र चीन दुवैतर्फ ठूलो मानवीय र भौतिक क्षति भएका कारण लामो समयसम्म नाका बन्द अवस्थामा थियो ।

भूकम्प सृजित कठिनाइ पन्छाएर सीमितरूपमा मात्रै सञ्चालन भएको नाका विसं २०७६ फागुनमा विश्वव्यापीरूपमा कोरोना महामारी फैलिएपछि पुनःबन्द भएको थियो ।

चीनबाट सीमित सामान आयातका लागि खुला रहेको नाकाबाट २०८० वैशाख १८ गतेबाट दोहोरो आयात निर्यात खुलाइएको थियो । हाल यो नाकाबाट दैनिक चार, पाँच कन्टेनर फलफूल तथा अन्य सामान आयात हुने गरेको छ ।

तातोपानी भन्सार कार्यालयका प्रमुख भन्सार अधिकृत दयानन्द केसीका अनुसार यो नाकाबाट आयात हुने मालवस्तुमा ९० प्रतिशत फलफूल हुने गरेको छ । चिनियाँ व्यापारीले नेपालमा यो नाकाबाट फलफूल भित्र्याउने गरेका छन् ।

यो नाकाबाट मानिस आवतजावत हुँदा नेपाल घुम्न आउने चिनियाँ पर्यटक बढ्ने नेपाल चीन उद्योग वाणिज्य संघका पूर्वअध्यक्ष राजेशकाजी श्रेष्ठले बताए ।

यसका साथै पारी आएको सामान छिटो ल्याउन सजिलो हुने उनले बताए । उताबाट आएको सामान केकस्तो आयो भनेर हेर्न नसक्ने अवस्थालाई पनि सहज हुने श्रेष्ठले बताए ।

“हाम्रो भनाइ त सामान रोक्नै हुँदैन भन्ने हो । त्यहाँ गोदाम बनाइरहेको छ । उताको सामान उतै झार्ने गरिएको छ,” उनले भने, “हाम्रो भनाइ त गाडी सिधै लार्चासम्म आउनुपर्याे र हाम्रो ट्रकमा सामान राखेर काठमाडौं वा अन्य स्थानसम्म पुग्नुपर्‍यो, जानुपर्‍यो । नाकाबाट मानिसको आवतजावत हुन थालेपछि केही व्यावसायिक सहजता पनि हुन्छ ।”

त्यस्तै, नेपाल चीन उद्योग वाणिज्य संघका अध्यक्ष त्रिभुवनधर तुलाधरले तातोपानी नाकाबाट मानिस आवतजावत हुँदा स्थानीय नेपालीको रोजगारी खुल्ने बताए ।

“आठ वर्षदेखि नेपाली नाकाबाट उता जान पाएको थिएन । अब यो नाकाबाट मानिस आवतजावत हुन थालेपछि नेपाली काम गर्न जान पाउने भएका छन् । यसले सहजता भएको छ,” उनले भने, “स्थानीयहरू सामान किन्न जान पनि सहज हुन्छ । नेपाल आउने चिनियाँ पर्यटकहरू बढ्छन् ।”