काठमाडौं । नेकपा (एकीकृत समाजवादी)का सम्मानित नेता झलनाथ खनालले एमसीसीका नाममा राष्ट्रहित विपरीतको कुनै पनि सर्तहरू मान्य नहुने बताएका छन् ।

शुक्रबार विश्व ट्रेड युनियन महासंघ, समन्वय समिति नेपालले काठमाडौंमा आयोजना गरेको एक कार्यक्रममा खनालले खुल्लारूपमा अमेरिकाले गर्ने सहयोग लिन कुनै समस्या नहुने तर एमसीसीका नाममा देशको स्वाभिमान र स्वतन्त्रताविरुद्ध कुनै सर्तहरू मान्य नहुने बताएका हुन् ।

उनले एमसीसी सम्झौतामा दर्जनौ असमान सर्तहरू रहेको जिकीर गरे । एमसीसीको व्याख्यात्मक घोषणा दलहरूको लाज ढाक्ने ठाँउ मात्रै रहेको र यसको कुनै कानुनी हैसियत नरहेको उनको भनाइ छ ।

त्यस्तै, खनालले अमेरिकी साम्राज्यवादको विश्व रणनीतिको केन्द्रबिन्दु चीन घेर्ने भएकाले त्यसका लागि नेपाललाई आफ्नो स्वार्थ पूरा गर्ने माध्यम बनाएको तर्क गरे ।