काठमाडौं । नेपालमा आर्थिक वर्ष (आव) २०७८/०७९ को तुलनामा गएको आवमा होटेलको व्यापारमा रौनक देखिएको छ । विश्वभर फैलिएको कोरोना महामारीको कारण पर्यटन क्षेत्र ठप्प हुँदा होटेलहरू घाटामा गएका थिए । तर, विस्तारै पर्यटन क्षेत्र चलायमान हुन थालेसँगै होटेलको व्यापार बढेको हो । जसले गर्दा होटेलहरूले नाफा बढाउन थालेका छन् ।

नेपाल स्टक एन्सचेन्ज (नेप्से)मा चार पाँचतारे होटेल सूचीकृत छन् । ओरियन्टल होटेल्स लिमिटेड (र्‍याडिसन), तारागाउँ रिजेन्सी होटेल्स (हायात), सोल्टी होटेल्स लिमिटेड र सिटी होटेल नेप्सेमा सूचीकृत छन् । ती होटेलले प्रकाशित गरेको वित्तीय विवरणमा व्यापार बढेको देखिएको छ ।

एनजीओ, आईएनजीओका सभा, सेमिनार, पार्टी, भोजभतेर बढेकाले होटेलहरूको व्यापारमा सुधार भएको होटेल एसोसिएसन अफ नेपाल (हान)का अध्यक्ष विनायक शाहले बताए ।

“पछिल्लो समय सभा, सेमिनार, भोजभतेर, पार्टी अत्यधिकरूपले बढेको छ । त्यो जम्मै बिजनेस उहाँहरूकहाँ छ । त्यसकारण उहाँहरूको व्यापार राम्रो भएको हो,” शाहले बाह्रखरीसँग भने, “रुमबाट भन्दा पनि ब्वेङ्क्वेटको कारणले व्यापार बढेको हो ।”

कुन होटेलको व्यापार कति ?

र्‍याडिसन होटेलको वित्तीय विवरणअनुसार गत आव २०७९/०८० मा एक अर्ब नौ करोड ४० लाख ५३ करोड ७९२ रुपैयाँ बराबरको व्यापार गरेको छ । उक्त होटेलले अघिल्लो आव २०७८/०७९ मा ५७ करोड दुई लाख ४२ हजार २०३ रुपैयाँको व्यापार गरेको थियो ।

हायात होटेलले गत (आव) मा एक अर्ब ५७ करोड दुई लाख ७४ हजार ५४५ रुपैयाँको व्यापार गरेको छ । अघिल्लो आवमा ८४ करोड ८८ लाख ७१ हजार ६७८ रुपैयाँमा व्यापार गरेको थियो ।

यस्तै, सोल्टी होटेलले गत आवमा दुई अर्ब २४ करोड ९१ लाख ८८ हजार ५१३ रुपैयाँको व्यापार गरेको छ । अघिल्लो आवमा एक अर्ब ३६ करोड ९१ लाख २४ हजार ३९ रुपैयाँको व्यापार गरेको थियो ।

नेप्सेमा सूचीकृत अर्काे सिटी होटेलको व्यापार घाटा पनि सुधार भएको छ । सिटी होटेलले गत आवमा ४७ करोड ३१ लाख ५१ हजार १५५ रुपैयाँको व्यापार गरेको छ । अघिल्लो आवमा १८ करोड ९१ लाख ६४ हजार ५४१ रुपैयाँको व्यापार गरेको थियो । 

यस होटेलको व्यापार घाटा अघिल्लो आवको तुलनामा गत आवमा २८ करोड ३९ लाख ८६ हजार ६१४ रुपैयाँले सुधार भएको हो ।

कुन होटेलको नाफा कति ?

र्‍याडिसन होटेलले गत आव २०७९/०८० मा १७ करोड ८४ लाख ३० हजार ४५४ रुपैयाँ नाफा गरेको छ । यो होटेल अघिल्लो आव २०७८/०७९ मा दुइ करोड ४६ लाख एक हजार ९९१ रुपैयाँमा घाटामा थियो ।

हायात होटेलको नाफा पनि करिब दोब्बरले बढेको छ । उसले गत आवमा ३८ करोड २६ लाख ४० लाख १०६ रुपैयाँ नाफा गरेको छ । अघिल्लो आवमा १९ करोड पाँच लाख ५७ हजार ४२२ रुपैयाँ नाफा गरेको थियो ।

यस्तै, सोल्टी होटेलले गत आवमा ५४ करोड ५१ लाख ५४ हजार ९६१ रुपैयाँ नाफा गरेको छ । अघिल्लो आवमा २९ करोड ७१ लाख ४३ हजार १९५ रुपयाँ नाफा गरेको थियो ।

सिटी होटेलको घाटा भने अघिल्लो वर्षको भन्दा बढेको छ । गत वर्षमा २७ करोड ३६ लाख ३६ हजार ३६४ रुपैयाँ घाटा रहेको छ । अघिलो आवमा चार करोड ४६  लाख ८२ हजार ९७६ रुपैयाँ घाटामा थियो । 

यस होटेलको अघिल्लो आवको तुलनामा गत आवमा २२ करोड ८९ लाख ५३ हजार ३८८ रुपैयाँ बढी घाटा भएको छ ।