काठमाडौं । नेकपा (एकीकृत समाजवादी)का अध्यक्ष माधवकुमार नेपालले समाजवादी शक्तिसामु दलाल पुँजीवादी मुख्य खतराका रूपमा देखा परेको बताएका छन् । आइतबार काठमाडौंमा आयोजित एक कार्यक्रममा उनले यस्तो बताएका हुन् ।

देशको अर्थतन्त्रको विकासमा अनेकौँ बाधा खडा भएको उनले उल्लेख गरे । देशमा सुशासनको प्रत्याभूति गर्ने विषयमा पनि अनेक व्यवधान भइरहेको उनले बताए । प्रतिकूल र अवरोधमूलक काम गर्नेहरूसँग जुध्नुपर्ने आवश्यकता रहेको उनको भनाइ छ ।

“संविधानमा लेखिएका कुराहरू व्यवहारमा लागु गर्न बाँकी नै छ । यी सबै परिवेशमा विस्तृत डिस्कोर्सको आवश्यकता छ । विस्तृत छलफल, बहसको आवश्यकता छ । अहिले समाजवादी शक्तिहरूका सामु दलाल पुँजीवादी शक्ति मुख्य खतराको रूपमा देखा परेको छ । यही दलाल नोकरसाही पुँजीवाद भन्नुहोस्, वित्तीय पुँजीवाद भन्नुहोस्, यसले सर्वहारा श्रमजीवी जनता, आम नेपाली जनतालाई शोषण, उत्पीडनको मारमा पारेका छन्,” उनले भने, “देशको अर्थतन्त्रको विकासमा अनेकौँ बाधा–व्यवधान खडा गरेका छन् । देशमा सुशासनको प्रत्याभूति गर्ने कुराहरूमा अनेक अवरोधहरू खडा गरेका छन् । ती सबै प्रतिकूल काम गर्ने, अवरोधमूलक काम गर्ने ती प्रवृत्तिहरूका विरुद्धमा हामीले जुध्नुपर्ने आवश्यकता छ ।”

अध्यक्ष नेपालले नेता–कार्यकर्ता घुलमिल हुनुपर्ने आवश्यकता रहेको औँल्याए ।