काठमाडौं । काठमाडौंमा कौडा खेलिरहेको अवस्थामा १३ जना पक्राउ परेका छन् । शनिबार साँझ प्रहरीले उनीहरूलाई नियन्त्रणमा लिएको हो ।

टोखा नगरपालिका–१, झोरस्थित एक टहरामा कौडा खेलिरहेको अवस्थामा उनीहरूलाई पक्राउ गरिएको प्रहरीले जनाएको छ ।

पक्राउ पर्नेमा काठमाडौंकै नागार्जुन नगरपालिका–१ का ४४ वर्षीय रोशन ठकुरीसहित १३ जना छन् । प्रहरी वृत्त महाराजगन्जबाट खटिएको टोलीले उनीहरूलाई १६ थान कौडा र नगद तीन लाख २६ हजार रुपैयाँसहित पक्राउ गरेको जनाइएको छ ।

यस्तै, जुवातास खेलिरहेको अवस्थामा चारजना पक्राउ परेका छन् । बूढानीलकण्ठ नगरपालिका–११, कपनमा डेरा गरी बस्दै आएका संखुवासभाको मकालु गाउँपालिका–१ का ५२ वर्षीय पासाङ शेर्पाको कोठामा जुवातास खेलिरहेको अवस्थामा उनीहरू पक्राउ परेका हुन् । शेर्पासहित चारजनालाई शनिबार साँझ प्रहरीले नियन्त्रणमा लिएको हो ।

प्रहरी प्रभाग कपनबाट खटिएको टोलीले उनीहरूलाई नगद एक लाख १३ हजार ५०० रुपैयाँ, एक लाख भारतीय रुपैयाँ, एक हजार १०० अमेरिकी डलर र तीन बुक ताससहित पक्राउ गरेको जनाइएको छ ।