काठमाडौं । नेपाली राष्ट्रिय क्रिकेट टिमका कप्तान रोहितकुमार पौडेलले एसिया कपमा भारत र पाकिस्तानसँग खेल्दा विश्वले हेर्ने भएकाले उत्कृष्ट प्रदर्शनको प्रयास गर्ने बताएका छन् ।

पाकिस्तान र श्रीलंकामा आयोजना हुने प्रतियोगिताका लागि बिदाइ कार्यक्रममा बोल्दै रोहितले पहिला भारतसँग खेल्ने सोच नभए पनि पाएको अवसरमा उत्कृष्ट प्रदर्शन गर्ने बताए ।

“पहिला भारतसँग खेल्ने भन्ने सोच नै हुँदैनथ्यो । अब अहिले अवसर पाएका छौँ । त्यो अवसरलाई सम्मान गरेर भारत र पाकिस्तानविरुद्ध बेस्ट दिने प्रयास गछौँ । भारत र पाकिस्तानसँग खेल्दा संसारले हेरिरहेको हुन्छ, आफ्नो उत्कृष्ट प्रदर्शन दिनेछौँ,” रोहितले भने ।

उनले नेपाली टिमले पहिलो पटक भारत र पाकिस्तानसँग खेल्न लागेकाले टिमका सबै उत्साहित रहेको बताए ।

“पहिलो पटक एसिया कप खेल्दैछौँ । सबैजना उत्साहित छौँ । प्रतियोगितामा हामी भारत र पाकिस्तानसँग एकै समूहमा छौँ । पहिलो पटक उनीहरूसँग खेल्दैछौँ, त्यसकारण सबैजना उत्साहित छौँ । तयारी पनि राम्रो छ । समग्रमा सबै ठिक छ,” रोहितले थपे ।