काठमाडौं । नायिका वर्षा राउतले अहिलेको समयमा सिनेमामा स्क्रिन टाइमले खासै अर्थ नराख्ने बताएकी छन् । स्क्रिन टाइमभन्दा पनि पावरफूल भूमिकाले विशेष महत्त्व राख्ने उनको भनाइ छ ।
“रोल कति लामोभन्दा पनि त्यो कति पावरफूल छ भन्ने कुराले अर्थ राख्छ । म रोल कति लामो छ भन्दा पनि मलाई अफर गरिएको रोल कति महत्त्वपूर्ण छ भनेर हेरिरहेको हुन्छु,” सिनेमा ऐंचो पैंचो’ निर्माण टोलीले आयोजना गरेको सञ्चारकर्मीसँगको भेटमा उनले भनिन्, “तपाईंहरूले याद गर्नुभएको छ भने देख्नुभएकै होला, मेरो क्यारेक्टरले सिंगो फिल्म चलाएको सिनेमा गरेको छैन ।”
आफूले दर्शकको दिमागमा प्रभाव पार्ने सिनेमा रोज्ने गरेको उनी बताउँछिन् । “सिन दुई मिनेटको होस् वा पाँच मिनेटको, मेरो उद्देश्य दर्शकको दिमागमा त्यसले छाप पारोस् भन्ने हुन्छ । त्यो क्यारेक्टरले दर्शकको दिमागमा छाप पार्छ भन्ने लाग्यो भने म त्यो सिनेमामा काम गर्छु,” वर्षा भन्छिन्, “यो सिनेमामा मेरो कस्तो भूमिका छ, त्यो त म भन्न चाहन्नँ, किनभने मेकरले खुलाउन चाहनुभएको छैन । राम्रो मेकर त्यो हो रे जसले आफ्नो कलाकारको रोल हलमा नआउँदासम्म लुकाउन सक्छ ।”
चलचित्र ‘ऐंचो पैंचो’लाई कृषा चौलागाईंले निर्देशन गरेकी छन् ।
अरू सिनेमामा भन्दा यसमा राम्रो काम गरेको प्रतिक्रिया आफूले मेकरबाट पाएको वर्षा सुनाउँछिन् ।
वर्षाले ‘ऐंचो पैंचो’मा आफ्नो सिन छोटो रहेको भनेर मेकरसँग असन्तुष्टि जनाएको भन्दै चलाइएको हल्लामा सत्यता नरहेको बताइन् । आफ्नो रोल काटिएकाले वर्षाले निर्देशकसँग असन्तुष्टि जनाएको भन्दै भ्रम फैलाउने काम गरिएको उनको भनाइ छ ।
“रोल छोटो भयो भन्ने असन्तुष्टि भएको भए म सुरुमै साइन गर्दिनँ थिएँ । एडिटिङमा काटेर छोटा बनाएको भनेर चित्त नबुझेको भए पनि निर्देशकसँगै भन्ने थिएँ,” वर्षा भन्छिन्, “अरूसँग भन्नुपर्ने कारण नै छैन । म सिनेमाको हरेक कार्यक्रममा अन्य कलाकार र निर्देशकसँग हिँडेको छु । चित्त नबुझेको भए यसरी हिँड्ने नै थिइनँ ।”
प्लेन डिले भएका कारण सिनेमाको एउटा कार्यक्रममा आफू पुग्न नसकेको उनले प्रस्ट पारिन् । “एउटा कार्यक्रममा म आउन नसकेको हो, सायद अरू कलाकार आउँदा म किन आइनँ भनेर अनुमानका भरमा यो कुरा आएको हुनसक्छ,” उनले भनिन् ।
वर्षासँगै स्वस्तिमा खड्का, कोसिस क्षेत्री, मुकुन भुसाललगायत कलाकार मुख्य भूमिकामा रहेको सिनेमा ‘ऐंचो पैंचो’ यही भदौ १४ गते रिलिज गरिँदै छ ।
-1716278128.jpg)
-1734691541.jpg)
