राजनीतिसँगै पारिवारिक–सामाजिक विषयमा केन्द्रित रहेको छ, चलचित्र ‘ऐंचो पैंचो’ । निर्देशक कृषा चौलागाईंले सिनेमामा राजनीति एउटा लेयरमात्रै भएको तर मुख्य विषय अरु नै भएको बताएकी छन् । स्वस्तिमा खड्का, वर्षा राउत, मुकुन भुसाल, सुशील सिटौला, कोसिस क्षेत्री, राजाराम पौडेल, रमेश बुढाथोकीलगायत कलाकार मुख्य भूमिकामा छन् । दर्शकले रुचाएका कलाकार सिनेमा छन् । मेकरले स्टारवारको लोभ गरेको हो, राजनीतिक विषय समेटिएको चलचित्र दर्शकको रोजाइमा पर्छ, सिनेमाको व्यापारमा पब्लिसिटी डिजाइनको भूमिका कति हुन्छ भनेर निर्देशक कृषासँग बाह्रखरीले गरेको छोटो कुराकानी : 

ऐंचो पैैंचो राजनीतिक विषयमा केन्द्रित सिनेमा हो ?
राजनीतिक विषयमा मात्रै केन्द्रित सिनेमा होइन । सिनेमाभित्रका विभिन्न लेयरमध्ये एउटा लेयर मात्रै हो राजनीति । पारिवारिक–सामाजिक कथा हो । राजनीतिक कुराहरू भन्दै गर्दा यो पूरै सिनेमालाई नै छायामा पार्दै छौँ कि भन्ने लागिरहेको छ । यसमा दिदी–बहिनीको कथा छ । साथीको कथा छ । बाउ र छोरामा हुने भिन्न प्रकारको सम्बन्ध छ । समसामयिक कथा छ । सबैलाई आकर्षण गर्ने विषयमा सिनेमा बनेको छ । 

समाजमा बसेपछि कोही पनि राजनीतिबाट भाग्न सक्तैन । हरेक व्यक्तिसँग राजनीति जोडिएको हुन्छ । यसको एउटा लेयर हाम्रो चलचित्रमा छ । 

थोरै होस् वा धेरै राजनीतिक विषय समावेश गरिसकेपछि त्यसका लागि ठूलो क्यानभास चाहिन्छ नि ? 
कुनै पनि विषय समावेश गरिसकेपछि त्यसका लागि मानसिक रूपमा पनि तयार हुनुपर्छ । विषयलाई न्याय गर्ने प्रोडक्सन हुनै पर्छ । आर्थिक, मानसिक र प्रोडक्सन डिजाइनका हिसावले पहिला नै तयार हुनुपर्छ । हामीले जति गरेका छौँ, मेरो विचारमा दर्शकले चित्त बुझाउने नै छ । यो भन्दा ठूलो क्यानभासमा काम गर्ने रहर पक्कै पनि छ । अहिले हामीले जति काम गरेका छौँ, हाम्रो बजेट अनुसार राम्रै काम गरेका छौँ । 

पछिल्लो समय सिनेमा त्यति धेरै चलिरहेका छैनन्, पब्लिसिटीको अभाव त होइन ? पब्लिसिटी डिजाइन केही फरक तरिकाले गर्न सकिँदैन ? 
सिनेमाका लागि पब्लिसिटी निकै महत्वपूर्ण कुरा हो । तर, मैले पछिल्लो समय अनुभूत गरेको कुरा के हो भने अन्ततः सिनेमा नै राम्रो हुनुपर्छ । आफूलाई मन परेको जानराको सिनेमा मात्रै हेर्ने दर्शकको संख्या पनि बढिरहेको छ । 

नराम्रो सिनेमा बनाउने कसैको रहर हुँदैन । दर्शकको रोजाई अनुसारको सिनेमा नै बनाउँ भन्ने चाहना सबैमा हुन्छ । आम दर्शक र मेकरको रोजाई कुनै समय एउटै हुन्छ । त्यो समय सिनेमा सफल हुने हो । 

‘ऐंचो पैंचो’लाई विषयप्रधान सिनेमा भन्न मिल्छ ?
विषय उठान नगर्ने त सिनेमा नै हुँदैनन् । तर, पक्कै पनि पछिल्लो समय अब्स्ट्रयाक मुभीलाई विषयप्रधान सिनेमा भन्ने गरिएको छ । ऐंचो पैंचो कमर्सियल कन्टेन्ट बोकेको सिनेमा हो । 

चल्तीका कलाकार लिनु भएको छ । स्टारपावरको लोभ हो ?
समाजमा धेरै मान्छे बस्छन् । धेरै मान्छेलाई सिनेमा रिलेट गराउनुपर्छ । यो समाजका तपाईं, म र ऊ सबैलाई सिनेमामा देखाउनु पर्छ । लभस्टोरी सिनेमामा केटा र केटी मुख्य भूमिकामा हुन्छन् । अरु धेरै पात्र नै चाहिँदैन । तर, सामाजिक विषयवस्तु उठान गर्दा धेरै कलाकार चाहिन्छ । त्यसैले पनि हाम्रो सिनेमामा धेरै कलाकार जोडिनु भयो । 

दशर्कले रुचाएको कलाकार राखेर सिनेमा चलाउने लोभ मेकरमा हुन्छ र स्वाभाविक पनि हो । होइन भने जो कसैलाई डेब्यु गराएर काम गर्दा पनि हुन्थ्यो । चलेको कलाकारलाई लिँदा उहाँहरूको समयअनुसार काम गर्नुपर्छ । उहाँहरूको निश्चित पारिश्रमिकको कुरा आउँछ, त्यसलाई फलो गर्नुपर्छ । सिनेमा चल्नलाई दर्शकले मन पराएको कलाकार पनि हुनुपर्छ । तर, यसो भन्दैमा कलाकारमात्रै राखेर कन्टेन्ट र मेकिङमा ध्यान नदिएको भने होइन । 

राजनीतिदेखि समाज दिक्क भइसकेको छ । त्यही राजनीति सिनेमामा पनि हेर्न हलसम्म किन जाने भन्ने मनस्थितिमा दर्शक रहेको पाइन्छ । कतै दर्शकले त्यही मनस्थिति पो बनाइरहेका छन् कि ?
राजनीतिदेखि कोही पनि भाग्नै सक्तैन । राजनीति मात्रै सिनेमामा छैन । राजीतिसँगै अपडेटेड पक्ष पनि चलचित्रमा छ । हाम्रो समाजमा अहिले केही मेयर हुनुहुन्छ जो पार्टीबाट जितेर आउनु भएको होइन । तर, के उहाँहरू राजनीतिसँग जोडिनु भएको छैन र ? उहाँहरूले राष्ट्रियतालाई बढाइरहनु भएको छ । युवापुस्ताको मन जित्नु भएको छ । चाहेर होस् वा नचाहेर यसबाट टाढा कोही जान सक्दैन ।