काठमाडौं । देशका केही भू–भामा आज बाढीको सम्भावना रहेको छ । केही जिल्लामा भारी वर्षा भइरहेको र केहीमा वर्षाको सम्भावना रहेकाले बाढीको जोखिम रहेको हो । 

आज ताप्लेजुङ, पाँचथर, तेहथुम, संखुवासभा, सोलुखुम्बु, सिन्धुपाल्चोक, रसुवा, नुवाकोट भएर बहने नदी तथा खोलामा जलसतह बढ्ने बाढी पूर्वानुमान महाशाखाले जनाएको छ । 

मकवानपुर, सिन्धुली, चितवन, कास्की, लमजुङ, पर्वत, पाल्पा, डोटी, बझाङ र आसपास भएर बहने स–साना नदी तथा खोलामा पनि बहाव बढ्नसक्ने पूर्वानुमान रहेको छ । 

वाग्मतीसहित यी हुन् आज भारी वर्षा हुने प्रदेश

यी जिल्लाका नदी तथा खोलाको तटीय क्षेत्रमा रहनेले सामान्य सतर्कता अपनाउनस पर्ने महाशाखाले आग्रह गरेको छ । 

आगामी तीन दिन कोसी, नारायणी, महाकाली, कन्काई, कमला, वाग्मती, पूर्वी राप्ती, पश्चिम राप्ती, बबई र यसका प्रमुख सहायक नदीहरूमा जलसतह सतर्कता तहभन्दा तलै रहने पूर्वानुमान रहेको छ । त्यसैले आउँदो तीन दिन देशका प्रमुख नदीहरूमा बाढीको जोखिम न्यून रहने पूर्वानुमान रहेको महाशाखाले जनाएको छ ।