तनहुँ । पहिरोका कारण अवरुद्ध भएको पृथ्वी राजमार्गअन्तर्गत तनहुँको म्याग्दे गाउँपालिका–६, मौरीबजारखण्ड सञ्चालनमा आएको छ ।

मौरीबजारस्थित सडकमा माथिबाट खसेको पहिरोका कारण आज बिहान ७ बजेदेखि बाटो दुईतर्फी अवरुद्ध भएको थियो । पहिरो हटाएर राजमार्ग पुनः सञ्चालन गराइएको हो ।

स्थानीय पालिका, प्रहरी जनशक्ति र चिनियाँ कम्पनीसँगको समन्वयमा दुई डोजरको सहायताले पहिरो हटाएर बाटो खुलाइएको जिल्ला प्रहरी कार्यालय तनहुँका प्रहरी नायब उपरीक्षक मोहनबहादुर खाँणले जानकारी दिए ।

केही दिनदेखि परेको अविरल वर्षाका कारण पृथ्वी राजमार्गको तनहुँखण्डमा पहिरोको जोखिम बढेको छ । राजमार्गअन्तर्गत मुग्लिन–पोखरा सडक विस्तार आयोजनाको कामका कारण विभिन्न ठाउँमा पहिरोको जोखिम बढेको छ । सडकछेउका भित्ता काट्ने काम गरिएकाले वर्षासँगै पहिरो झर्ने गरेको छ ।

शनिबार र आइतबार तनहुँखण्डका दुई ठाउँमा पहिरो गएको थियो । शनिबार साँझ आँबुखैरेनी गाउँपालिका–४, ऐना पहरानजिकै ठूला ढुंगा खसेर सुक्खा पहिरो जाँदा केही समय राजमार्ग अवरुद्ध भएको थियो । राति नै ढुंगा पन्छाएर सडक एकतर्फी सञ्चालन गरिएको थियो । आइतबार दिउँसो मात्र राजमार्ग दुईतर्फी भएको थियो ।

आइतबार बन्दीपुर गाउँपालिका–१, बेलभञ्ज्याङमा पहिरो जाँदा अवरुद्ध सडक डेढ घण्टापछि सञ्चालनमा आएको थियो । पहिरो खसेर सडकमै लेदो जमेपछि सडक विभागसँग समन्वय गरी बाटो खुलाइएको थियो ।

वर्षासँगै पृथ्वी राजमार्गका विभिन्न ठाउँमा पहिरो जान थालेको छ । शुक्रबार मात्र कन्टारमा सडक भासिएर चार घण्टा राजमार्ग अवरुद्ध भएको थियो । त्यसअघि, गएको मंगलबार व्यास नगरपालिका–१२ स्थित देउरालीमा सडक भासिँदा दिनभर यातयात अवरुद्ध भएको थियो । रासस