काठमाडौं । चीनको एक विद्यालयमा पौडी प्रशिक्षकले सात वर्षीया बालिकाको टाउको बारम्बर पानीमा डुबाइरहेको एक भिडियो सार्वजनिक भएको छ ।

पढाउने बेला ध्यान नदिएको भन्दै यस्तो गरेको भनिएको भिडियोलाई लिएर सामाजिक सञ्जालमा कतिपय मानिसले आक्रोश समेत पोख्न थालेका छन् ।

यही अगस्ट ७ मा उक्त भिडियो सार्वजनिक भएको थियो । वार्षिक सात हजार अमेरिकी डलर शुल्क लाग्ने एक विशेष अन्तर्राष्ट्रिय किन्डरगार्टनमा अध्ययनरत बालिकालाई गत महिनाको अन्तिममा पौडी प्रशिक्षकले चारपटक पानीमुनि चोपलेका हुन् ।

पूर्वी चीनको झेजियाङस्थित उक्त विद्यालयले ती प्रशिक्षकलाई बर्खास्त गरेको छ । तर, घटनाको विषयलाई  लिएर उनीमाथि कुनै अनुसन्धान गरिएको छैन ।

विद्यालयको पौडीपोखरीको सीसीटीभी फुटेजमा ती प्रशिक्षकले बालिकालाई नजिकैका दुई सहपाठीबाट तानेर बारम्बार उनको टाउको पानीमुनि धकेलेको देखिन्छ ।

त्यस दिन घटनाबारे बालिकाका आमाबुवालाई जानकारी गराइएन । अर्काे दिन आमाले घरमा बालिकालाई नुहाइदिने क्रममा कपाल धुन खोज्दा रोकेकी थिइन् । उनले ‘आमा, म कपाल धुन्नँ, मलाई निस्सासिने डर हुन्छ’ भनेकी थिइन् । त्यसपछि उनले अघिल्लो दिन स्कुलमा भएको घटना सुनाएकी थिइन् । बालिकाले प्रशिक्षकले पटक–पटक आफूलाई पानीमुनि धकेलको बताएकी थिइन् ।