काठमाडौं । अरुण काबेली पावर कम्पनी लिमिटेडले आउँदो भदौ ८ गतेदेखि हकप्रद सेयर निष्कासन गर्ने भएको छ । कम्पनीले हाल कायम चुक्तापुँजीको शतप्रतिशत हकप्रद सेयर निष्कासन गर्न लागेको हो ।

कम्पनीले हाल कायम एक कित्ता सेयरबराबर नयाँ एक कित्ता सेयर निष्कासन गर्न लागेको हो । हाल कम्पनीको चुक्तापुँजी एक अर्ब ८५ करोड ५२ लाख १० हजार ५०० रुपैयाँ रहेको छ । यहीबराबरको प्रतिसेयर १०० रुपैयाँअंकित मूल्यका हकप्रद निष्कासन गरिने कम्पनीले जनाएको छ ।

कम्पनीको हकप्रदमा असार २४ गतेसम्म कायम सेयरधनीले मात्र आवेदन दिन सक्नेछन् । कम्पनीले असार २५ गते बुकक्लोज गरेको थियो । सोहीअनुसार असार २४ गतेसम्म नेपाल स्टक एक्सचेन्ज (नेप्से)मा सूचीकृत भई कारोबार गरेका सेयरधनीहरूले सो हकप्रदका लागि आवेदन दिन पाउनेछन् । सेयरधनीले भदौ २८ गतेसम्म आवेदन दिन सक्नेछन् ।

कम्पनीको सेयर निष्कासन तथा बिक्री प्रबन्धक नबिल इन्भेष्टमेन्ट बैंकिङ लिमिटेड रहेको छ । लगानीकर्ताले नबिल इन्भेष्टमेन्ट, अरुण काबेली पावर, हिमालयन बैंक र नबिल बैंकका तोकिएका शाखा कार्यालयहरूबाट आवेदन दिन सक्नेछन् ।

नेपाल धितोपत्र बोर्डबाट अनुमति लिई आस्वा सेवामा सहभागी बैंक तथा वित्तीय संस्थाहरूबाट सी–आस्वा प्रणालीमार्फत र सीडीएस एन्ड क्लियरिङबाट निर्माण गरिएको मेरोसेयर वेबसाइट प्रयोग गरी पनि आवेदन दिन सकिनेछ ।

हकप्रद निष्कासनका लागि गराएको रेटिङमा इक्रा नेपालले कम्पनीलाई ‘इक्राएनपी त्रिपल बी माइनस इस्युअर’ रेटिङ प्रदान गरेको छ । यसले समयमा वित्तीय दायित्व वहन गर्ने क्षमतामा औसत सुरक्षित रहेको संकेत गर्छ ।